SPA patut dipadah pasal SSLR

KUCHING: Sapit Kepala Menteri Tan Sri Datuk Amar Dr James Jemut Masing minta perambu ngaga Sarawak-Sabah Link Road (SSLR) patut diterang ngagai Kaunsil Perambu Nengeri (SPA) nyengkaum pekara belanja.

“Tentuka belanja bisi, anang semina nemu nyebut aja baka projek bukai sebedau tu ti jelungan.

“Aku ngarapka projek jalai ti nyambung Sindumin di Sabah enggau 14 mengeri besai di Sarawak ukai danji manis,” ku iya nyeriri.

Ku Masing, projek tu patut nerima pemendar ari SPA dulu lalu iya enda nemu sekalika sida udah bulih pemendar SPA tauka enda.

“Aku enda nemu, sida udah nerima pemendar SPA tauka enda laban nadai sebarang penerang sentang pekara nya naka diatu.

“Semina deka madah ngagai Menteri Kereja Raya Baru Bian, rentayan jalai nya patut diberi ngagai SPA ngambika dikemendar laban tiap jalai baru enda tau enda nengah kaunsil nya. Enda ulih dikeluang,” ku iya.

Iya ti mega Menteri Infrastruktur enggau Pemansang Penyangkai Kapal mansutka jaku nya lebuh dirandau pemberita pengudah Pengawa Nyuaka Chek ngagai 105 Penerima MRP Renggat 4 penyampau RM1.3 juta di Dun, tadi.

Suara Sarawak