‘Spiderwoman’ narit ati nembiak rindu belajar

KUCHING: Pengajar Nancy Maria chukup kreatif narit ati bala nembiak ngambi deka belajar, pemadu baru iya ngerasukka baju ‘Spiderwoman’ maya ngajar nembiak nengah Google Meet.

Nengah penerang dikunsi ba Facebook iya, Pengajar Nancy madahka laki iya ti ngelinsu baka mua spiderwomen nya sebaka enggau baju dikena iya.

“Laki aku ti nero mua aku baka nya laban aku enda ulih ngajar ngena karung nangika enda ulih ngajar nembiak.

“Iya nganta mua aku baka nya pengelama 35 minit lalu kami duai ngena aja kereban penganta dikemisi dalam rumah.

“Sekumbang ngajar nengah Google Meet tu, iya ti rajin nyendiaka endur aku ngajar, nyambung wayar enggau ngambar aku benung ngajar,” terang Pengajar Nancy.

KREATIF… Mua Pengajar Nancy diantaka laki iya empu nitihka baju ‘spiderwomen’ ti dikena iya.

Ku iya, semua pekayan asal nya endang koleksyen iya empu lalu tiga iti baju aja dipinjau lebuh ngajar nengah Google Meet nya.

Entara baju ti dipinjau Pengajar Nancy iya nya pekayan asal Dusun Tanana, Sabah, Bidayuh enggau Lun Bawang.

“Kebendar, tu baju laki aku laban kami duai suah meli baju nitihka ‘tema’ lebuh bisi pengerami tauka program belanda.

“Manah aku ngena baju nya ari ditaruh dalam kutak aja,” terang Pengajar Nancy.

Nambahka nya, Pengajar Emmet ba sebengkah penerang ba Facebook mega muji iya kreatif narit ati bala nembiak belajar nengah online.

DIPUJI… Pengajar Emmet muji pemintar kreativiti Pengajar Nancy narit ati bala nembiak ngambi rindu belajar nengah online.

Bemacham inisiatif dipejalai Pengajar Nancy ngambi bala nembiak gagit ngulu kelas online nengah Google Meet nya.

Tu nyengkaum ngena bemacham pekayan asal, ngubah bilik endur ngatur kelas online, nukar selap mija ngajar nitihka pekayan asal dikena iya lebuh nya.

Inisiatif nya sebagi ari chara Pengajar Nancy meri peransang ngagai iya ngambi ransing agi ngajar bala nembiak nengah online.

“Aku dekaka bala nembiak gaga enggau gagit nganti ngulu kelas nengah Google Meet.

“Pia mega, aku dekaka bala nembiak tu rindang maya belajar online,” ku Pengajar Nancy.

Sebedau tu, Pengajar Nancy Maria udah ngerasuk sari, ngepan Iban, pekayan asal bansa Melanau enggau Bidayuh lebuh ngatur kelas online ungkup bala nembiak iya.

Kreativiti dikembuan Pengajar Nancy ngasuh iya beberita laban pintar berundingka chara ngambi nembiak rindu belajar kelimpah iya ngembuan siti tuju, enggai nembiak tinggal pelajar.

Bala pengajar ngena pelasar online iya nya ngena aplikasyen Google Meet ngajar bala nembiak sekumbang sekula ditutup ketegal pandemik Covid-19.