SPAOH: Bemacham perambu benung dipejalaika Perintah Sarawak dikena nempa Spaoh nyadi hab pemansut pemakai dikena nyungkak ekonomi rama rayat dia.

Sapit Premier Sarawak, Datuk Amar Douglas Uggah Embas madah, inisiatif nya dipejalai ngambi pengempu tanah enggau orang bekebun ulih nyungkak penatai pemisi besai sereta negap pemansang ekonomi rama menua pesisir.

“Nya kebuah kami ngarap ulih bekerejasama enggau Kaunsil Pengintu enggau Penyaga Tanah Sarawak (Salcra) dikena ngepun pengawa nupi chapi ba kebun sawit sida,” ku iya.

Uggah mansutka jaku nya rambau bejadi Komiti Pemansang enggau pengelikun Genturung Pendiau (JKKK) Kampung Jawa Nabau sereta bejadi pengawa nutup Kelas Ngajat ba Rumah Panjai Suri Lalang, ditu tadi.

Adun Bukit Saban nya madah, raban sida merambu deka nupi kambin ba sitak nya lalu program ba renggat keterubah nya udah berengkah dipejalai sekeda penengkani kambin.

Ku iya, pengawa nupi manuk kampung diatu nerima peminta besai ba makit.

“Kitai ngembuan urung 3,000 ruang bilik ba sitak Bukit Saban tang enti 1,000 ruang bilik tu nupi manuk, kitai deka mansutka asil ti mayuh ba makit.

“Pia mega, kitai meransang rayat ditu ngaul diri ba penagwa nanam jagung nyadi ke pemakai jelu,” ku iya.

Iya mega madah, pengawa nyulam baju Dabong enggau baju Buriek majak tebilang sereta nerima mayuh peminta ba makit.

Bekaul pengawa nupi jani, Uggah ngelalau bala penengkani jani nganti atur enggau lalau ari Opis Servis Veteriner (JPV) Sarawak laban penyakit Renga Babi Afrika agi nyadi ba Sarawak.

Pia mega iya madah, Padang Bilun Bebuling benung ba renggat digaga, nya alai rayat Spaoh patut nyikap diri napi ubah pemansang ba mayuh sukut.

“Padang bilun ti beungkus RM296 juta tu deka mantu kitai nyapai rega ba makit ba timpuh ti pandak.

“Nya kebuah perintah diatu benung berati ke inisiatif dikena ngemansang sektor dagang temuai laban kitai ngembuan mayuh palan dagang temuai ti manah ditu,” ku iya.