BINTULU: Premier Sarawak Datuk Patinggi Tan Sri Abang Johari Tun Openg ngemendarka bonus sebulan setengah gaji ngagai semua staf Kaunsil Pemansang Bintulu (BDA).
Iya madah, bonus nya dikena ngaku enggau ngenang pengiruh sereta jasa besai semua staf BDA ti udah mai mayuh pemujur enggau pemansang ngagai Bintulu.
“Begulai enggau Kaunsil Direktor BDA, kami deka meri terima kasih ngagai semua raban BDA ari mayuh renggat enggau pemeri bonus sebulan setengah gaji.
“Aku ngarapka ari bonus tu, dia penatai pemisi BDA deka terus nambah ngambi bonus ulih diberi baru ila,” ku iya lebuh bejadika Pengerami Makai Lemai Ngintu Genap Taun Ke-45 BDA di Restoran Dinner World ditu, malam tadi.
Abang Johari ke mega Chairman BDA madah, kenyau ari kaunsil nya ditumbuh dalam taun 1978, dia BDA udah ngatur singkang ngubah semua langkar rampa Bintulu lalu ngangkatka menua nya nyadi mengeri industri ti mansang di Malaysia.
Nya alai iya mai semua raban bela ngerami 45 taun BDA enggau 60 taun Sarawak Merdeka di Malaysia nengah kerejasama nempa pemansang enggau pengelantang di menua tu datai ke jemah.
Ba pengerami nya, Abang Johari mega udah ngelancharka Pelin Strategik BDA 2024-2030 sereta dipebasa nyuaka Anugerah Servis Nyulut 2022 ngagai bala staf BDA.
