SERIAN: Bisi 166 Pegawai Integriti Bepenau (CeIO) ari Unit Integriti enggau Ombudsman Sarawak (Unions) deka diengkah ba mayuh opis, unit sereta serikat bekaul perintah enda lama agi.
Sapit Menteri ba Opis Premier Sarawak (Integriti enggau Ombudsman), Datuk Murshid Diraja Dr Juanda Jaya madah, inisiatif nya dipejalai ngambi orang gawa perintah ba menua tu ngemerat ke integriti, pengelurus enggau atur pengawa ti manah.
Iya nyemetak madah, semua pegawai nya ditempa asil ari buah runding Premier Sarawak, Datuk Patinggi Tan Sri Abang Johari Tun Openg ba baruh atur Unions 2018.
“Semua sida (CeIO) deka diengkah ba mayuh opis menteri, opis perintah, unit, badan bekanun enggau sekeda kompeni perintah bekaul.
“Empai lama Perintah Sarawak ngaga pemutus ngambi semua ripot belanja enggau langgur belanja ari badan bekanun sereta raban penguasa dibantai ngagai Komiti Khas Kabinet ba baruh Unions.
“Pekara tu ngambi dipansik enggau dipejurai sebedau dianjung ngagai kabinet,” ku iya.
Juanda mansutka jaku nya rambau Program Bejadi Roadshow Integriti Edisyen Tujuh 2023 Pelilih Serian ba sebuah hotel tebilang, ditu kemari.
Iya madah baru, inisiatif nya sebengkah inisiatif Perintah Besai dikena negapka atur pengawa sereta pengulih pengatur ba sesebengkah organisasyen perintah dikena bejalaika tuju enggau tanggungpengawa organisasyen nya ti ngasi agi.
Iya nyemetak madah, Perintah Sarawak mega nanggam kerejasama enggau Institut Integriti Malaysia (IIM) dikena ngemansang perengka engkeman dikena nempa atur pengawa manah, integriti enggau nyeliah penyalah makai suap.
Ba lansa sebaka, ku iya, mensia mayuh diperansang nyukung Unions munas tiris ba servis nengah pengawa ngaga ripot nengah unit nya ngambi pansik ulih dipejalai ngagai sida ti diripot lalu ukai mantai pekara nya ba media rama.
“Semua ripot deka dipansik bepelasar gaya ombudsman antarabansa baka ngembuan pengelantang, hak sebela enggau nyaga resia,” ku iya.
Dulu ari nya, Roadshow Integriti Edisyen Ketujuh 2023 nya dipenyadi Menteri Pelajar, Inovasyen enggau Pemansang Bakat, Datuk Roland Sagah Wee Inn.
Program nya dirichah nengah licha ari Opis Pengintu Pengelantang Komuniti Sarawak sereta Komiti Besai Nagang Penyalah Makai Suap Malaysia (SPRM) Sarawak bekaul integriti.
Sama datai Sapit Menteri Industri Pemakai, Komoditi enggau Pemansang Wilayah Sarawak, Martin Ben, Adun Bukit Semuja, John Ilus, Pengari Direktor Unit Integriti enggau Ombudsman Sarawak, Wan Mohamad Wan Drahman sereta temuai dipebasa bukai.
