ARTIKEL

PEGARI NAMA… Nama Stanford majak pegari pengudah deka ngarika Malaysia lebuh deka dikangau bepekit nebah Sape ba panggau dunya.

Stanford Ryan temegah ngarika menua nebah Sape ba panggau dunya

Facebook
Twitter
LinkedIn
WhatsApp
Telegram

PENGERINDU Stanford Ryan Sidi nebah Sape ngerembai kenyau ari taun 2013 nyentuk diatu.

Belabuh ari nya tadi, baka orang ti benung labuh pengerindu, Stanford nyau majak ingin belajar nebah Sape kelimpah ngansah pengelandik diri.

“Keterubah ninga tebah Sape, nyau asai ke labuh pengerindu, lama tegenung rindang ninga pemanah tebah enggau bunyi Sape nya kelebih agi ba churung radio.

“Tang aku rindu ninga aja lalu apin bisi tekuing runding deka nguji belajar nebah Sape.

“Pemuas ninga lalu suah meda orang nebah Sape, nyau berunding ga aku baka ni gaya nebah kereban muzik asal Orang Ulu nya.

“Kebuah pia laban suah endar kitai meda penebah Sape profesional enggau tebangkar nama nebah kereban muzik nya baka Mathew Ngau Jau, Alena Murang, Elizabeth Bungan, Jerry Kamit enggau ke bukai.

“Pengelandik enggau pemanah gaya jari sida nebah Sape nya ngerindu ke ati nyentuk nama sida pegari,” ku iya.

Genap iku kitai bisi pengerindu tauka munyi ku orang diatu, minat kediri empu.

Nya kebuah, pengerindu Stanford nebah Sape ngujung ke iya belabuh nguji belajar ngena gitar dulu laban apin bisi Sape kediri empu.

Iya madah, iya nguji belajar gitar dulu taja enda sebaka enggau Sape tang bulih penemu mimit.

LANDIK… Stanford mujur bulih perais sagu ati ba Pekit Sape Junior.

IDOLA

Ba taun 2017, ku Stanford, baru iya meli siti Sape ari siku penengkebang Sape benama Ding Luhat.

“Naka pengaga ba kuan dada, enda ulih disebut pengagit laban ulih meli Sape lalu runding tadi, sigi terus nguji ke Sape nya.

“Sepanjai pulai ke rumah, sigi tuchum aja laban juluk deka bisi Sape kediri empu udah nyadi nyata.

“Udah nya, sigi ngasak amat aku nebah Sape, taja pen lebuh nya empai nemu tiun ti betul,” ku Stanford tuchum ngenang pengagit diri.

Bujang sigat asal ari Sibu nya madah, orang ti meransang iya lalu majak ke pengerindu nebah Sape sigi nadai orang bukai iya nya Jerry Kamit.

Ku Stanford, iya chukup rindu meda Jerry Kamit nebah Sape nyentuk ulih nebah Sape ngagai renggat antarabansa.

Temegah endar ati meda pemujur iya ulih mai kereban muzik asal tu panggau dunya, ku iya.

“Lebuh meda pemujur Jerry Kamit nyentuk panggau dunya, dia aku meransang ati diri laban keterubah meda iya nebah Sape ngujung ke iya sigi amat keran nebah Sape.

“Tang ba Sibu suba pengawa nebah Sape agi kurang lalu aku mega bedau ngelala laban aku baru deka nguji nebah Sape, dia aku mupuk belajar kediri ari YouTube.

“Ba YouTube meh aku belabuh belajar, mupuk mimit meh tudah diri laban rindu ga belajar kediri sereta ngelemi ke jari.

“Puji Tuhan, bisi pelasar YouTube dikena belajar enggau ngansah pengelandik diri, mupuk begadai dataika landik lalu ulih ngangkatka diri nengah pengawa nebah Sape tu,” terang Stanford.

PENGUJI BELAJAR

Nampung randau ke dalam agi, Stanford madah, genap pengawa dikereja kitai udah tentu bisi penguji lalu ukai semua pengawa dikereja nya lanchar aja.

Tang ku iya, penguji ti datai nandang nya ngajar kitai ngambi semampai bebendar ngansah baru pengelandik diri dataika landik.

“Munyi ku jaku sempama, belakang duku enti diansah tau meh nyadi tajam.

“Engkeman endar jaku sempama tu senentang pengawa kitai bebendar ngansah penau enggau pengelandik diri ngambi majak ‘tajam’.

“Nyau ngenang peneleba sekumbang belajar Sape tu, laban tudah diri nadai orang ngajar berasai pedis endar.

“Bisi sekali nya, nyau putus pengarap lalu asai deka badu nebah Sape laban pedis belajar kediri laban tak enggai nyadi Sape nya ditebah.

“Bisi sebulan aku ngetu nebah Sape laban pedis deka nebah kereban muzik asal nya, tambah mega nadai orang ngembing.

“Taja pia, baka selatan udah diatur Petara, aku kala tepedaka Jerry Kamit merindang enggau nebah Sape ba Zoobee dalam taun 2017,” ku iya.

Nyadi, iya pen datai meda Jerry Kamit nebah Sape begulai enggau bala bukai ke sama landik.

IDOLA… Stanford begambar enggau siku penebah Sape profesional enggau tebangkar nama ke nyadi idola iya, Jerry Kamit.

SEMANGAT IDUP BARU

Ari pemerindang nya, Stanford madahka diri bulih mayuh penemu pasal Sape ngujung ke semangat deka belajar Sape idup baru.

Nyau teperansang baru ga tudah diri laban nyau bulih mayuh penemu senentang pengawa betebahka Sape tu, ku iya.

“Lebuh datai ba pemerindang nya, semangat aku baka idup baru laban udah nemu baka ni chara nebah Sape, baka ni chara jari nebah Sape.

“Nyau enda berasai takah empat bulan udah nya aku lalu landik nebah Sape tu, naka pengaga ati laban juluk deka masuk pekit Sape nyadi nyata seraya majak ngansah pengelandik diri.

“Pekara dipelajar aku ari pengawa nebah Sape tu kesatu, reti enggau guna belajar kereban muzik asal chukup besai.

“Kebuah pia laban kitai Dayak tu chukup rindu ke tiun Sape enggau orang luar baka Semenanjung enggau menua luar.

“Ninga aja bunyi Sape ba menua orang bukai pen udah ngasuh kitai lelengau ke menua.

“Sape tu baka lambang kitai Dayak, besai reti muzik Sape laban majak dikelala dunya, sapa-sapa nemu nebah Sape endang temegah enggau diri empu.

“Naka diatu, aku bedau bisi ati belajar kereban muzik asal bukai laban diatu agi meri perati nebah Sape dulu ngambi ngelemi ke jari.

“Engka udah landik ila, ka ga nguji kereban muzik asal ke bukai,” ku iya.

SAPE JUNIOR

Enda kala ngadang pengerindu nebah Sape meransang Stanford masuk bemacham pekit baka pekit Sape online ti diatur Sape Times ba taun 2022.

Lebuh nya, iya madahka diri semina ulih datai ba renggat semifinal aja lalu ba taun 2023 masuk Pekit Sape Junior tang lebuh nya semina bulih perais sagu ati aja.

“Tang enda nyangka jereki ba taun 2024, asai ke bula enggau enda pechaya aku ulih nebah Sape datai ba panggau antarabansa pengudah dikangau bepekit ba World Championships of Performing Arts (WCOPA) bulan June tu di Long Beach California, USA,” terang iya.

Nya kebuah, Stanford madahka diri kala nebah Sape ba bemacham program baka Pengerami Makai Lemai Mantar Gawai, Pengerami Pakan, Pengerami Durin enggau Pengerami Melah Pinang.

Iya mega kala nebah Sape ba Program Citrawarna, Program Countdown New Year 2022, Borneo Cultural Festival, Sape Times Competition, Sape Junior, Malaysia Championships Of Performing Arts (MCOPA) enggau kepenudi nya, World Championships Of Performing Arts (WCOPA).

PENELEBA BEREGA… Stanford begambar ungkup kenang enggau bala penyereta Pekit Sape Junior.

PELUANG BEREGA

Peluang berega endang enda disadang, baka jereki enda disangka, ku Stanford.

“Sebedau masuk WCOPA, kami meseti bepekit ba MCOPA dulu. Bisi bida iya, MCOPA tu ba Malaysia aja sebedau dipilih enggau ulih masuk WCOPA ke mega renggat dunya.

“Lebuh nya, aku bisi meda iklan pekit tu ba TikTok nyentuk tekait ati laban aku nemu, idola aku Jerry Kamit pen kala masuk pekit tu suba.

“Ari nya aku ngiga website ba Google endur rejister. Maya rejister, bemacham kategori dial alu aku rejister ba kategori instrumental.

“Ba dia, sida minta video aku nebah Sape laban sida deka meda sekali ke aku ulih masuk pekit tu.

“Takah seminggu nya, sida madahka aku ulih masuk pekit lalu masuk renggat semifinal MCOPA.

“Kami semifinal ba Sabah, keterubah enggau pekit baka tu chukup takut asal ati. Tegepang asai ati sekali ulih masuk renggat final ti diatur di Kuala Lumpur.

“Ba pekit renggat final, aku bepekit enggau tujuh penyereta ari selampur Malaysia lalu bulih lumur tiga.

“Taja bulih lumur tiga tang aku enda nyangka dipilih ngarika Malaysia ba panggau dunya ila.

“Naka pengaga ulih dipilih, ka nyabak asai laban enda ngadang pengerindu nebah Sape udah ngangkatka diri lalu ngarika menua ba pekit dunya,” ku iya.

Ngenang penyikap masuk pekit dunya, Stanford madahka diri benung nyendiaka 10 buah lagu enggau tiun ti bebida laban kategori instrumental ila sida deka bepekit ngena lima buah lagu bebida.

Iya diatu mega benung nyendiaka pekayan deka dikena kin lalu bisi ngaga keretas minta pelanja laban ungkus kin ditanggung sida empu.

“Baka ditemu kitai, ungkus ngagai menua ribai nya chukup mar lalu aku bisi nganjung surat minta belanja disukung ari Serakup Anak Seni Kuching (PUSAK) mega.

“Ngarapka bisi bulih belanja ngambi ulih datai ba California begulai enggau tim Malaysia bepekit ila.

“Sekumbang masuk bemacham pekit Sape, Puji Tuhan… chukup mayuh jereki enggau peneleba diulih aku lalu ari nya tadi aku ulih ngansah baru pengelandik diri.

“Arapka pejalai nyingkang ngagai California dikemujur lalu ulih mai nama Malaysia tampak bebendang ba mata dunya,” ku Stanford ngempung penemu diri.

BERITA LAIN

Rampa menua meruan beresi

Aum Parti-Parti (COP) Konvensyen Langkar Pengawa Ubah Klimet Gerempung Bansa Beserakup (UNFCC) ngempuru bemacham raban pemegai taruh antarabansa ari dunya dagang, perintah enggau komuniti sivil.

BERITA TERBARU

Umat Islam puasa Ramadan dua kali pada tahun 2030

Kalendar Hijriah Islam dihitung berdasar putaran bulan, manakala kalendar Gregorian atau Masehi dikira berdasar perjalanan bumi mengelilingi matahari. Justeru, ini menyebabkan umat Muslim berpuasa 36