Stanley Jeffery,26, iya nya siku penanyi biak Iban ke chukup bepenau sereta landik nulis leka lagu asal ari menua Kanowit.
Nitihka penerang ke dikirum nuju Ruai, Suara Sarawak, Stanley ke benung gawa ba Sibu madah diri rindu sereta beteladanka siku penulis leka lagu tebilang Iban iya nya Ricky J.
Udah nya, iya madah berengkah nagul pengawa ba industri muzik Iban kenyau ari taun 2017 lalu diterima masuk nyadi penanyi 2018 begulai enggau Serikat Irama.
“Terubah suba endang nadai minat lalu ba pengawa nulis leka lagu tang diatu pengawa nya nyau nyadi pengawa dikena ngisi maya lepa.
“Aku rindu nusun rintai lagu nitihka pinta bala penanyi taja pan nama aku agi semun tauka kurang dikelala mensia mayuh dalam industri tu,” ku iya ke seruran enda leju ngasilka lagu-lagu baru.
Berebak enggau nya, Stanley madah naka tu lebih ari 40 ito genre lagu udah ditengkebang iya kenyau ari taun 2018.
Mulaika kenang ba taun 2019 suba, dia Stanley kala dipadu nyadi direktor ungkup album kompilasi ke digaga ba taun ke sama.
Ngelansa pasal pengawa nengkebang leka lagu, Stanley madah
diatu sapa-sapa aja ulih ngaga lagu ,tang mayuh orang enda nemu nusun serta bejantilka jaku sempama ba lagu ngena tiun ke setimbal.
“Kebendar leka lagu mesti dijait enggau betul ngambika lagu nya manah didinga orang mayuh.
“Ungkup penemu leka lagu tu mai reti ti pemadu besai ba siti-siti lagu laban lagu tu sempama baka benih padi.
“Ambika banding enti benih iya manah tentu padi nya nyamai diempa. Baka nya mega enggau sesebengkah lagu ke ditengkebang tauka disadaka bala penanyi,” ku iya.
Nangkan ke nya, Stanley madah leka lagu tu nyadi tulang belakang pengering sesebengkah lagu. Iya sempama kitai ke berumah, leka lagu nyadi tiang, nyadi tiun lalu muzik nya nyadi perabung.
Nya alai, pengawa ngasilka siti-siti lagu ukai sebarang,” ku tandu Stanley.
Taja pia, Stanley madah pengawa ngasilka bemacham genre lagu endang bisi pemar lebih ba jeman diatu agi mengkang ngena chara betulis.
Siti lagu ke bisi digaga iya dalam album Gawai 2022 tu tadi iya nya diberi nama Nama Ke Tuah Maya Gawai disadaka Shanty Wine.
“Siti penimpang ke pemadu besai diasai ba tudah diri lebuh ngaga leka lagu tu iya nya empai bisi pengelandik ngaga tiun lagu,” ku iya.
Stanley madah diri tetap enda mantul ati lalu besemaya deka ransing agi ngasilka lagu-lagu bekualiti ungkup didinga bala peminat industri lagu Iban.
Pesan Stanley nuju bala penanyi baik nya lama tauka baru ke deka nguji asil keranjai jari iya tau berandau enggau iya empu nengah chara nambah nyadi kaban Facebook ; STANLEY JEFFERY J FULL.
Ba pengujung jaku, Stanley meri terima kasih ngagai Suara Sarawak laban udah meri awak ngagai iya mantaika mua diri ngambika terus pegari beberita dikelala mensia mayuh.
