KUCHING: Pun penyadi statistik kes aksiden majak nambah ba Sarawak ketegal pengilap penguna jalai alun empu.
Sapit Tuai Polis Sarawak, Datuk Mancha Ata madah, statistik kes aksiden jalai alun ba nengeri tu nambah ari 5,938 kes ba taun nyin kemari ngagai 6,690 kes ba timpuh empat bulan keterubah ba taun tu.
“Pekara tu bisi nambah 752 kes ungkup timpuh bulan Januari nyentuk April taun tu.
“Bepelasar ke statistik kes dikembuan kami, pun penyadi penusah aksiden tu endang bepun ari pengilap penguna empu lebuh deriba ba jalai alun,” ku iya.
Mancha mansutka jaku nya rambau bejadi Kimpin Pengelikun Jalai Alun Gawai Dayak 2023 ba Palan Bebeli Barang Farley, ditu sehari tu.
Iya madah, statistik kes aksiden jalai alun nyerumba musin Gawai Dayak ba taun 2022 bela ngirau ke ati laban bisi nambah enti dibanding ba taun 2021.
Terang iya, penyampau kes aksiden enggau bebadi nyawa ti dirikod nyerumba pengerami nya ba taun nyin kemari iya nya 423 kes enggau 18 kes bebadi nyawa.
“Tu nunjukka kes aksiden bisi nambah 221 kes enggau 11 kes bebadi nyawa enti dibanding 202 kes enggau tujuh kes bebadi nyawa ba taun 2021,” ku iya.
Mancha madah, Indu Opis Polis Kontinjen (IPK) Sarawak deka bejalaika Ops Khas ba pengelama lapan hari bernegkah ari 29 Mei nyentuk 5 June beserimbai Pengerami Gawai Dayak.
