KUCHING: Pengawa ngaku anak asil nikah champur di Sarawak nyadi Bumiputera digaga laban Perintah Sarawak meda mayuh orang nikah champur ba nengeri tu, ku Datuk Patinggi Tan Sri Abang Johari Tun Openg.
Kepala Menteri mega madah, diatu anak asil nikah champur deka bulih status Bumiputera nya siku ari indai tauka apai iya peranak (asal) Sarawak.
“Nya alai,kara tu mega mai reti kitai nadai agi ngembuan penanggul ba pekara ngatur ruang bilik,” ku iya.
Iya madah munyi nya nyerumba Pengerami Makai Lemai Penyerakup 2022 diatur Gerempung Besai China Bagi Menua Miri di Eastwood Valley Golf & Country Club Miri, malam tadi.
Dulu ari nya, RUU tu udah dikemendarka ba Aum Dun Sarawak kena 15 Febuari tu tadi lalu ngaku anak asil nikah champur bulih status Bumiputera taja semina siku apai tauka indai iya peranak asal Sarawak.
Nangkan ke nya, iya madah pengawa nya enda uluh ditagang laban nitihka pengingin diri.
“Mayuh udah nyadi pengawa nikah champur ba nengeri tu nyhengkaum China jadi enggau Melayu, Iban jadi enggau Melayu, Melanau jadi enggau Melayu enggau ke bukai,” ku iya.
Nya alai, Abang Johari madah anak asil nikah champur (hibrid) tu dikumbai pintar.
“Nyema pekara nya amaty nyadi Sarawak deka ngembuan mayuh orang pintar enggau mega mantu kitai nyapai juluk nyadi menua maju enggau besai penatai pemisi manggai taun 2030,” ku iya.
Berebak enggau nya, iya mega ngarapka penyerakup pupu bansa ba Sarawak ulih dijaga manah laban pekara nya chukup nyelai ba nengeri tu.
Ngelansa pekara bukai, ba pengerami nya mega Abang Johari bisi nyuaka chek RM5,000 ungkup Sekula Sekondari (SM) Pein Min enggau SM Riam.
Kelimpah ari nya, Abang Johari bisi ngagihka belanja sepenyampau RM500,000 ungkup Gerempung Besai China Bagi Menua Miri.
Sama bisi datai Sapit Kepala Menteri Datuk Seri Dr Sim Kui Hian, Menteri Perengka Pengangkut Datuk Seri Lee Kim Shin, Menteri Muda Pemansang Orang Indu enggau Anak MIt Datuk Rosey Yunus, Menteri Muda Pemansang Orang Dagang Dr Ripin Lamat, Kaban Parlimen Sibuti Lukanisman Awang Sauni, Adun Pujut ke mega Datuk Bandaraya Miri Adam Yii Siew Sang, Presiden Gerempung Besai China Bagi Menua Miri Datuk David Goh Kien Ping sereta bala bukai.
