KUALA LUMPUR: Opis Menteri Pengerai (KKM) benung baum enggau Opis Servis Perintah (JPA) dikena ngambi pengereja pengawa berubat ti bestatus kunterik ngagai sistem pangku pengawa tetap ti nadai pinchin.
Menteri Pengerai, Dr Zaliha Mustafa madah, nya dikena mutar penanggul tating pengawa ti ngelui ari penyampau pengereja pengawa ti endang bisi.
Ku iya, nya mega dikena ngelempung ke tating skim pinchin ditanggung perintah manggai RM29.1 bilion ba taun 2021.
“Kitai sedar tating belanja perintah bekaul skim pinchin tu ba taun 2011 manggai RM3.1 bilion lalu nambah ngagai RM29.1 bilion ba taun 2021.
“Tu tating belanja ti chukup besai lalu penyampau tu dipelaba majak niki.
“Nya alai, kitai ngiga chara dikena mutar penanggul tu nengah pengawa ngambi pengereja pengawa kunterik tetap tang nadai pinchin.
“Taja pia, sida ulih ngasaika pemaik baka pengereja pengawa tetap ti bukai baka ulih ngaga jali rumah,” ku iya ba Sesyen Tanya Saut ba Dewan Negara, kemari.
Dr Zaliha nibar jaku nya dikena nyaut tanya ari Datuk Jefridin Atan ti deka nemu sekali ke KKM belematika pengawa nambah ke pangku pengawa lutur kunterik dikena mutar penanggul tating pengawa staf pengerai.
Dr Zaliha mega madah, ketegal kes penyakit enda ngerampit (NCD) ti majak nambah, KKM napi penanggul pesakit ti majak nambah ba dalam enggau luar ba fasiliti pengerai kelebih agi ba sepital ti lebih ari pengereja pengawa ti endang bisi lalu ngujung ke penanggul sepital sekut.
“Dikena mutar penanggul sepital sekut, kitai udah bejalaika projek pemungkal ti betuai ke Tim Pengereja Pengawa Khas Reformasyen Sektor Perintah (STAR) ti ditumbuh ba baruh atur Tuai Sekretari Menua.
“KKM mega chakah bejalaika inisiatif digital dikena ngelempung ke tating pengawa raban KKM kelimpah bejalaika langgur kereja shif ti ulih meri timpuh belelak spanjai agi nyengkaum kemisi,” ku iya. – BERNAMA
