Status tiga pelilih menua bebali kuning

KUCHING: Status Pelilih Menua Kanowit, Sri Aman enggau Samarahan udah bebali ngagai status kuning pengudah ngerikod 20,19 enggau 11 kes berampit dalam menua ba timpuh 14 hari ke udah.

Komiti Penyangga Penusah Nengeri (JPBN) Sarawak mega madahka 12 Pelilih mengkang ba status mirah pengudah ngerikod 2,665 kes berampit dalam menua ba timpuh 14 hari ke udah.

Pelilih ti mengkang ba status mirah tu iya nya Serian, Bau, Subis, Julau, Selangau, Betong, Meradong, Kuching, Kapit, Bintulu, Miri enggau Sibu.

Pia mega, siti kluster punas kemari iya nya Kluster Jalan Pengiran di Matu seraya 26 kluster agi ngerekai ba menua tu.

Sarawak kemari ngerikod 168 kes baru positif Covid-19 iya nya 49 kes di Sibu, 37 kes di Bintulu, bela 19 kes di Miri enggau Betong, 12 kes di Kuching, bela 10 kes di Kapit enggau Meradong.

Nambahka nya, empat kes di Bau enggau Julau sereta tiga kes di Mukah enggau siti kes di Limbang ngujungka kes nambah ngagai 11,878 kes.

Ari 168 kes baru ti diripotka, semina 13 iku tauka 7.78 peratus udah mantaika kelai kena rampit.
Kes suman dirikodka kemari lebih ari kes positif iya nya 264 kes baru ti udah suman enggau dikemendar pansut ari sepital

Tu nyengkaum 141 kes ari Sepital Sibu, 55 kes ari Sepital Besai Sarawak (SGH), 21 kes ari Sepital Bintulu, 17 kes ari Sepital Sarikei enggau 12 kes ari Sepital Miri.

Nangkan nya, 11 kes ari PKRC Betong, enam kes ba PKRC di baruh Sepital Kapit enggau siti kes ba PKRC Sri Aman ngujungka kes suman nambah ngagai 9,388 iku tauka 79.04 peratus.

Naka diatu, bisi 2,360 iku agi diperubat ba wad isolasyen sepital ke alai 857 ikes ba Sepital Sibu enggau PKRC di Sibu, 374 kes di Sepital Miri enggau PKRC di Miri, 313 kes di Sepital Bintulu enggau PKRC di Bintulu sereta 271 kes agi diperubat ba SGH enggau PKRC di Kuching.

Bisi 195 kes agi diperubat ba Sepital Betong enggau PKRC di Betong, 184 kes di Sepital Kapit enggau PKRC di Kapit, 127 kes di Sepital Sarikei enggau PKRC di Sarikei, 18 kes di Sepital Sri Aman enggau PKRC di Sri Aman sereta 13 kes di PKRC Mukah.

Kelimpah ari nya, bisi tujuh kes agi diperubat di PKRC Serian enggau siti kes di Sepital Limbang seraya 178 PUI baru dirikodka enggau siti PUI agi nganti pemutus peresa makmal.

Naka 10 March tu tadi, bisi 26,844 iku udah dituchuk vaksin kenyau ari program betuchuk vaksin berengkah dipejalai kena 26 Februari tu tadi.

Suara Sarawak