Stella nampung pengawa asal indu rumah panjai

PAKAN: Pemuas ke dedunga nadai pengawa lebuh diau ba rumah panjai, Stella Seman, 24 taun, berasai tekait ati meda pemanah enggau pengalus utai dianyam sida serumah kelebih agi asil jari indai iya empu.

Indai beranak siku tu madah, iya rindang amat meda sida ke tuai beranyamka utai pengudah lepa ari pengawa berintuka ruang bilik enggau bebela di dapur.

Enti sebedau tu ku Stella, iya semina nyambil aja nyaup indai diri baka nyilup enggau ngetas laluh bila utai ke udah tembu dianyam serayaka beribun ba ruai.

“Enti agi mit suba, rindang amat bemain sebelah tanah enggau sungai laban rebak kami kira mayuh diri, nyau beumba-umba enggau pangan diri.

“Nya kebuah nadai entu beratika pengawa sida indai enggau bala ke tuai sebelah ruai. Siang hari sigi di tanah, semadi nyau serumba silau baru pulai ke rumah,” ku Stella ngepunka randau enggau Suara Sarawak.

Stella Seman

Lebuh manggai umur besekula, Stella enggau bala bakih bukai ke serambau bela diau bemalam ba buding laban takah entara sekula enggau rumah panjai jauh endar, enda ulih pulai hari.

Pengudah nembuka pelajar ikas Pom Lima, iya ngentapka pendiau diri ba rumah panjai sida di Rumah Giman, Kemedu, Kemalih Entabai ditu sebedau nirika ruang bilik diri empu.

Ku Stella, sekumbang ke diau ba rumah laban ke beruan, iya endang nadai mindah ke bukai pengudah tembu ngintu ruang bilik, duduk ngemata pengawa bala bukai ba ruai.

“Ari nya, aku teulihka runding deka nguji enggau orang beranyam lalu minta ajar indai.

“Bisi kena diri empu pama mih, enda ibuh ke dijual, ku anak ati aku din,” ku Stella madahka pengagit iya deka belajar suba.

ANYAM BEBUAH… Sekeda ari asil pengelandik jari Stella ke bisi dijual.

Terubah belajar bisi mar mimit ku Stella laban empai entu nemu ngira bila tauka lambar lalu indai iya ngajar ari pun, anyam dua dataika landik anyam bebuah.

“Udah nemu anyam dua, aku nguji buah anyam ke mar agi nitihka utai udah diajar indai kelimpah betanya ngagai sida ke tuai ti sama bisi beranyam ba ruai.

“Beranyam tu ukai semina penemu nganyam bila utai tang meseti meretika pengawa ngeraut, ngelit, nyilup, mingkai enggau nampung bila enti sema deka nganyam betampung baka tikai,” terang iya.

Ngenang bansa utai ke bisi dianyam Stella, chukup rindu meda pemanah enggau pengalus bila tikai, chapan, timpa, uyut, tubang, sidan enggau macham utai ke bukai.

Enti kitai berati ari utai dianyam tu, nadai kitai ngadang semua nya asil pengelandik jari endu Stella, tau dikumbai rebak baru nampung pengawa asal indu rumah panjai.

Stella madah, kelimpah ari beranyam, iya mega bisi ngaga tangu tauka marik empang dikena nambahka keresa diri empu enggau ke dijual enti bisi peminta.

“Pemerinsa kami ditu laban nadai line telefon. Pedis amat deka bekangau kelebih agi enti bisi penusah. Alah enda bedarat ngelawa bukit ngiga endur betelefon,” ku Stella nyimpul randau.

Nya alai ku Stella, barang sapa deka ngudar enggau meli utai dianyam iya tauka betanya silik, sida tau telefon ngagai ibu iya benama Julia ba lumur 017-9191579.

BADAS…. Sekeda ari asil keranjai jari Stella

 

LANDIK… Stella mega belajar nganyam tikai bebuah ari bemban enggau tali kutak.

Suara Sarawak