ARTIKEL

TEMEGAH... Stephen temegah ati begambar ba mua kedai iya.

Stephen pintar ngena pelasar e-dagang dikena ngelaku produk kraf jari diri

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KRAF jari kitai Dayak ti digaga ari leka marik baka tenggak, antin, gelang, marik, kantung enggau ti bukai majak dikerindu mensia mayuh enda ngira penempa enggau pengarap kelebih agi musin pengerami.

Ba Sarawak, pengawa ngaga kraf jari ari leka marik ukai semina dikena ngisi maya lepa aja tang siti pengawa ti ulih nyungkak penatai pemisi sereta nempa mayuh pedagang nyulut.

LABUH PENGERINDU
Stephen Sami Layang endang ngembuan pengerindu besai ba pengawa ngaga kraf jari ari leka marik lalu pengerindu iya ba pengawa nya bepun ari anak iya empu.

Ungkup penerang, anak iya chukup landik ba pengawa ngaga kraf jari ari leka marik sereta bedagangka produk diri.

“Bisi sekali anak aku enda ulih nembuka pengawa ngaga tangu tauka marik empang moden lalu aku nguji nampung enggau nembuka asil keranjai jari iya.

“Aku pen nguji nunda chara iya nusuk leka marik dikena nampung marik empang moden ti digaga anak aku setengan jalai nyentuk tembu.

“Udah nya, aku ngasaika diri landik nusuk leka marik enggau ulih ngasilka produk ari leka marik lalu aku pen labuh pengerindu ngagai pengawa tu,” terang iya.

Berengkah ari nya meh pengerindu iya ba pengawa ngaga kraf jari ari leka marik majak bebungai nyentuk iya ngaga pemutus besai mekuh pengawa nya.

Stephen nguji ngerembai pengelandik diri ba pengawa nya dikena ngerandang dagang sereta bedagangka produk diri nengah pelasar media sosial.

JULUK BESAI
Keterubah suba, Stephen semina bedagangka produk diri nengah pelasar media sosial baka Facebook enggau WhatsApp tang iya napi penanggul bekenaka pelasar nya.

Kebuah pia laban iya agi baru ngaul diri enggau pelasar nya lalu ngujungka iya ngaga pemutus deka muka kedai kraf jari kediri empu.

Juluk iya deka ngembuan kedai kediri empu mujur nyadi nyata ba bulan March 2021 pengudah tetemuka sebuah kedai ba mua rumah sida empu.

“Ba dia meh aku nyual produk kraf jari ti digaga kami duai anak aku.

“Nangkan nya, enti bisi orang ngudar, nya baru aku ngaga sereta ngirum produk nya ngagai sida,” ku iya.

Baca lain  MBKS chakah ngurang kes nipu online

CHUKUP KREATIF
Nengah penemu enggau kreativiti diri, Stephen ukai semina ngasilka kraf leka marik aja tang ngerembai nya ngagai mayuh produk bukai ti mujur narit ati bala pemeli ari nengeri bukai baka Kelantan.

“Bemacham produk ari leka marik digaga aku baka marik tenggak Sarawak, sementing, gelang enggau aksesori gari bansa Bidayuh ti bukai.

“Pia mega, sebedau bejualka produk leka marik tu, aku kala bejualka kantung Saloma ba pun taun 2016.

“Kantung nya chukup laku enggau dikerindu mensia mayuh nyentuk kala dijual ngagai Sabah enggau Semenanjung Malaysia baka Kelantan enggau penyampau urung 70 iti.

RANSING BELAJAR
Laban ngembuan pengerindu ti besai ba pengawa ngaga kraf jari ari leka marik, dia Stephen ransing ngansah penemu diri ba pengawa nya.

Iya nadai kala belajar ari orang bukai tang iya belajar kediri empu nengah pengawa meratika chara orang bukai nusuk leka marik enggau asil keranjai jari sida.

Taja udah manggai ba umur 53 taun, tang nya enda nanggul enggau madamka minat iya ti deka belajar dikena ngemanahka agi pengelandik diri.

“Aku pulai ke rumah lalu nguji belajar enggau ngaga kediri empu. Semina nya aja chara aku belajar suba.

“Suba sehari lebih aku ngaga siti produk ari leka marik laban berundingka langkar enggau chura tang diatu aku ulih ngaga dua produk tu dalam sehari,” ku iya.

REGA PRODUK
Ku Stephen, rega produk leka marik ti dijual iya bepanggai ba kualiti leka marik, perengka dikena, pemar produk nya digaga, upah ngaga enggau ti bukai.

Sebedau ngeletakka rega produk, iya bela mansikka rega produk nya ari pedagang bukai ngambi rega produk enda kelalu mar tauka murah.

Produk leka marik tu dijual enggau rega RM5 nyentuk RM170 nyengkaum antin, tenggak, gelang kaki enggau jari, tating marik enggau ti bukai.

Stephen madahka perengka dikena nyamai digiga tang iya pechaya bala pemeli pintar agi milih enggau nentu rega ti ulih dibeli sida.

TIMBAL MANAH
Peminta ari bala pemeli ngagai produk kraf jari leka marik semampai bisi sereta ngemantupka ati kelebih agi nengah akaun Shoppe.

Baca lain  Nanga Jambu, Lubok Antu deka disambung internet Febuari 2021

Ku Stephen, lebuh nyau semak bulan April enggau Mei, peminta bala pemeli majak nambah laban semak musin pengerami Gawai.

Bala pembeli ukai semina datai ari selampur Sarawak tang mega ari Sabah enggau Semenanjung Malaysia.

“Enti bulan bukai, peminta ari bala pembeli bisi kurang mimit tang enti dibanding bulan April enggau Mei, peminta bala pembeli bisi mayuh agi ari selama.

“Tu meri peransang ngagai aku ngasilka mayuh agi produk ti bekualiti dudi hari laban ngelaika bala pemeli pechaya ngagai asil keranjai jari aku,” terang iya.

MEKUH EKONOMI DIGITAL
Taja pen ngembuan kedai kediri empu tang nya enda chukup Stephen ngelakuka produk diri empu lalu nya kebuah iya ransing belajar chara ngena pelasar media sosial.

Pemansang teknologi digital meri pemaik ngagai pedagang kemaya hari laban ari nya sida ulih ngelakuka produk diri ngagai makit ti besai agi.

Berebak enggau nya, mayuh inisiatif udah dipejalai perintah dikena meransang bala pedagang baka Stephen ngulih penemu bedagang dikena ngerembaika produk diri.

Palan Pengerembai Penerang Nasional (NADI) tauka dikumbai Palan Ekonomi Digital (PEDi) sebedau tu ngesan tanggungpengawa ngemansang komuniti dikena nambahka penatai pemisi nengah pelasar e-dagang.

Palan tu nyendia mayuh peluang ngagai bala pedagang ba nengeri tu ngambi sida enda tinggal ba pemansang ekonomi digital.

Berebak enggau nya, Stephen madahka diri bisi dibantu NADI ba taun nyin kemari lalu andalka diri empu belajar mayuh chara enggau penemu bedagang.

Kelimpah ari Facebook, iya mega bela ngena pelasar Shoppe dikena ngelakuka produk diri ngambi bungkur makit besai agi ukai semina ba dalam tang ba luar Sarawak.

“NADI bisi datai madah deka mantu aku lalu berengkah ari nya aku ngerejister nama diri ngambi kus pechuma ti diatur sida sereta nguji muka akaun Shoppe.

“Laban aku enda nemu baka ni chara bedagang nengah Shoppe, aku naka ulih minta ajar raban NADI ngena aplikasyen nya,” ku iya.

Nambahka nya, Stephen madahka diri tepantup ati ngelakuka produk nengah Shoppe sereta nerima mayuh peminta.

Baca lain  UNIFOR mai rayat idup lantang enggau likun

BEKUNSI PENEMU
Ukai naka nya aja, Stephen enda rangka penemu sereta bekunsika penemu diri ngagai sida ti betanya chara leka marik.

Raban NADI mega meri sukung nengah pengawa mantu iya numbuhka kelas ngagai sida ti deka belajar nusuk leka marik.

“Aku semina nyedia perengka dikena ngagai bala penyereta tang NADI ti nentu haribulan enggau nyedia setipikit ungkup bala sida.

Iya berasai gaga lebuh bala penyereta tepantup ati laban nya ngelai pekara diajar iya mujur narit ati sida.

“Pengudah aku ngajar sida ngaga kraf jari tu aku berasai tepantup ati laban ulih bekunsi penemu.

“Sida nerima penemu ti diajar aku lalu sida ngembuan minat deka belajar enggau rindu nitih utai ti diajar aku.

“Sida mega enda malu betanya maya sida enda meretika utai ti diajar aku,” ku Stephen seraya gaga ati lebuh bala penyereta muji penemu ti dikunsika iya.

MESETI DITAMPUNG
Dikena ngujungka randau diri, Stephen mega ngelalau mensia mayuh ngambi enda ngelengkaka pengawa nusuk leka marik tang nya meseti ditampung.

“Taja pen rega barang majak niki tang pengawa tu meseti ditampung laban semampai mayuh peminta.

“Nambahka nya, gaya, ukir enggau chura ti dikena mega ulih mandangka identiti tauka pengelala bansa kitai Dayak ba Sarawak,” ku pesan Stephen.

Berebak enggau nya, iya ngelalau mensia mayuh kelebih agi rebak baru ngambi ransing belajar ngaga kraf jari laban nya ulih nyungkak penatai pemisi.

“Aku meransang rebak baru meseti belajar ngaga kraf jari laban pengawa tu enda mar dipelajar,” ku iya.

Stephen ti udah enam taun mekuh pengawa dagang kraf jari tu mega merambu deka bekerejasama enggau raban NADI muka kelas ngaga gelang moden pengudah pengerami Hari Raya ila.

Mensia mayuh ti deka nemu silik bekaul produk kraf jari tauka ngudar asil keranjai jari Stephen diperansang ngelawa Shoppe Shili Beads and Craft tauka ngelawa terus kedai iya ba Jalai Kampung Kedaong, Lundu (sepiak Gading Foodcourt) tauka ngiga iya nengah Whatsapp ba lumur 019-8478168.

NARIT ATI… Marik empang moden ti digaga Stephen chukup kreatif enggaun narit ati.
LAKU… Kantung Saloma ti dijual iya chukup laku sereta nerima mayuh peminta.
BEKUNSI PENEMU… Stephen angkun ngajar bala penyereta nusuk leka marik.
BISI KUALITI… Tenggak ti digaga Stephen ari leka marik kemas enggau bisi kualiti.

NOTIS TENDER

BERITA LAIN

Sarawak ngembuan mayuh produk dagang temuai

KUCHING: Sarawak sekali agi negapka penuduk nyadi palan program dagang besai ba Eksibisyen Worldwide ungkup Dagang Temuai Insentif, Aum enggau Program (IMEX) Frankfurt ba Jerman

Komiti khas ditumbuh munas penyeranta

KUCHING: Kaban Komiti Khas deka ditumbuh ngambi mantu munas penyeranta ba selampur bagi menua di Sarawak. Menteri Pemansang Indu, Nembiak Mit enggau Pengintu Pengelantang Komuniti,

BERITA TERBARU