DARO: Perintah Sarawak nengah Kaunsil Pemansang Ekonomi Sarawak (SEDC) Energy deka ngerembai pengawa numbuhka Stesyen Minyak Petros ngagai sitak bukai ba selampur Sarawak.
Premier Datuk Patinggi Tan Sri Abang Johari Tun Openg madah, pengudah stesyen keterubah ditumbuh ba Kuching lalu pemadu baru ba Daro, stesyen nya deka dikerembai ngagai Pusa, Sibu enggau Kapit.
Ku iya, pemansang stesyen nya sebagi ari chara Sarawak ngelaku sereta berubah ari ngena minyak ngagai kuasa karan.
“Kitai deka ke entukar ngalih ari ngena minyak ti ngeluar ke karbon ngagai kuasa karan laban kitai bisi kuasa hidro dikena mansutka kuasa karan.
“Tu mega nentu ke rayat ulih ngena entukar teknologi baru ti manah ke agi rampa menua.
“Nya kebuah kitai deka ngerembai servis Stesyen Minyak Petros ngagai menua pesisir,” ku iya.
Abang Johari mansutka jaku nya ba aum pemberita serimbai pengawa bejadika Stesyen Minyak Petros – Daro, ditu tadi.
