KUCHING: Sijil Tinggi Persekolahan Malaysia (STPM) agi relevan enggau endang patut diterus.

Presiden Serakup Pengajar Sarawak (STU) Kullin Djayang madah iya besetuju enggau penemu Menteri Pelajar Fadhlina Sidek ti mantaika penemu STPM patut diteruska laban STPM nya endang diaku seikas Palan Pelajar Tinggi Perintah (IPTA), Palan Pelajar Tinggi Peribit (IPTS), enggau Antarabangsa baka GCE Advanced Level di UK.

“Ba penemu aku, STPM nya endang lebih tinggi laban nya peresa ti sama enggau serentak ba serata menua.

“Kelimpah ari nya, saut nembiak mega diperesa siku pemeresa khas ari sekula ti bebida enggau sekula chalun enti dibanding enggau peresa ti diperesa pengelicha tauka pengajar chalun empu,” ku iya lebuh ditanya Suara Sarawak kemari.

Ku iya, naka diatu STPM udah lama dikena ba menua tu, lalu bala pengajar udah ngembuan penemu ti luas dalam nentuka pemutus ti nyulut nembiak.

Nya alai, ku iya peluang nembiak nampung pelajar lebih tebuka sekali ke ba dalam tauka ba luar menua.

“STPM semina ngambi awak tiga semester ungkup nembiak sekula, nya timpuh ti pandak dikena sida nampung sekula ngagai degree.

“Naka diatu, STPM agi mengkang dibuka ba sekula perintah, udah tentu pekara tu mantu nembiak ti kurang penatai pemisi B40 nyambung sekula.

“Nyema sida tama matrikulasyen, nya endang nguna belanja lalu mayuh nembiak enda ulih nampung sekula laban suntuk belanja ngujungka sida enda ampit nampung ngagai palan pelajar tinggi,” ku iya.

Iya nangkan nya mantaika anak penemu ngagai KPM bekaul subjek ti dibuka ngagai nembiak STPM.

“Diatu subjek ti dibuka dalam STPM nyau kurang relevan enggau jeman tauka kurang makit, nya alai KPM ulih muka subjek bukai ti diguna ungkup pemansang pelajar menua.

“Kelimpah ari nya, engka ulih mantu nembiak STPM nyadi lebih bekualiti lebuh diau ba IPT menua enggau antarabansa.

“Semua tu lebih engkeman ari ti madamka STPM,” ku iya.

Ku iya baru, pengawa madamka STPM nyangka deka meri pengerugi ngagai nembiak jemah ila.