MIRI: Pemansang bakat nya tuju besai ngangkat makit pengereja pengawa ungkup pemansang meruan seraris enggau Langgur Pemansang Malaysia Lumpar Ke-12 (RMK-12).
Direktor Kaunsil Produktiviti Malaysia (MPC) Wilayah Sarawak, Dr Mazlina Shafi’i ti datai ngagai Program Minggu Dagang Mikro, Mit enggau Jelan Pemesai (PMKS) 2023 Zon Sarawak madah, strategi enggau inisiatif pemansang bakat patut ditegap.
Ku iya, tu dikena nempa pengereja pengawa landik, nyapai pampas pengereja ti lurus agi, negapka penyampau pengereja pengawa enggau sistem nyukung makit pengereja pengawa.
“Bemacham inisiatif udah dipejalai dikena nyaup nambah produktiviti makit pengereja pengawa baka ngaku Setipikit e-shared Prosperity Organisation (eSPO).
“Pengawa ngaku tu diberi ngagai serikat ti bejalaika sistem gaji enggau upah nitihka penyulut sereta tikas produktiviti organisasyen chara inklusif.
“eSPO nya indikator ngagai organisasyen ti diaku udah ulih meri pemaik begulai dikena nempa pengereja landik enggau nambah produktiviti sereta mansutka penatai pemisi tinggi agi,” ku iya.
Mazlina mansutka jaku nya ba Program PMKS 2023 Zon Sarawak di Miri, ditu kemari.
