STU mantah perambu nginsil SPM

KUCHING: Sarakup Pengajar Sarawak (STU) madahka perambu deka nginsil peresa Sijil Pelajaran Malaysia (SPM) 2020 ukai perambu ti engkeman laban peresa tu enda sebaka enggau peresa Ujian Penilaian Sekolah Rendah (UPSR) enggau PT3.
Presiden STU Adam Prakash Abdullah madahka SPM ukai semina setipikit dikena ngelai nembiak apus sekula tang nyadi kelai tauka tiket dikena sida minta masuk institusyen pelajar tinggi.
“Enti kitai meri setipikit SPM nitihka pemutus peresa ba sekula, kitai deka napi pemar nyeririska tikas pemandai sida.
“Baka ni gred A+ ba sekula A tau sebaka enggau gred A+ ba sekula B?” ku iya dalam siti penerang media, kemari.
Adam madahka pekara nya deka nanggul lebuh ngenukuka setipikit nya amai tauka bula nyentukka mai pengerugi ngagai nembiak empu.
“Pia mega, chalun SPM 2020 nadai skor ‘Penilaian Berasaskan Bilik Darjah’ ti tau dikira nyadi mata merit meri setipikit SPM.
“STU endang mereti sentang penanggul bala nembiak lebuh datai napi peresa SPM maya pengerekai penyakit Covid-19, tang kami ngarapka Opis Menteri Pelajar enggau Opis Menteri Pengerai ulih tetemuka jalai pemutar ti engkeman enggau selamat awakka proses peresa SPM 2020 ulih dipejalai nitihka taga.
“Kami enda deka nyukung pemutus ti ulih meri pangka ngagai kualiti pelajar nembiak, nya alai STU meransang apai indai enggau mensia mayuh terus nyukung bala nembiak dalam napi peresa tu awakka ulih ngapuska peresa SPM sida enggau meruan,” ku iya.
Iya mega ngarapka perasa SPM tu ulih nyadi pekara penyukat ungkup bala nembiak sedar pasal sida begunaka pemutus ti manah lebuh beperesa tauka penentu dalam proses ngulihka pengawa.
Dulu ari nya, Chairman Parti Tindakan Demokratik (DAP) Chong Chieng Jen dalam penerang madahka iya udah nganjung surat mosyen ngagai Opis Menteri Pelajar ngambika nginsil peresa SPM 2020 lalu meri setipikit ngagai nembiak nitihka peresa ba sekula aja.
Ku Chieng Jen, peresa SPM tu ulih ngusutka runding bala nembiak laban lama udah nganti peresa ti patut dipejalai ujung taun nyin kemari kelimpah ngeruga pengerai laban pengerekai penyakit Covid-19 diatu majak niki.

Suara Sarawak