Suara Sarawak ulih dipeda dalam e-paper

“Kami pechaya nengah pelasar tu, kami ulih nagit mayuh agi orang ke deka macha enda ngira sekat geopolitik tauka jam.”

KUCHING: Edisyen e-paper Suara Sarawak enggau New Sarawak Tribune mujur dipenyadika Menteri ba Opis Kepala Menteri (Integriti enggau Ombudsman) Datuk Talib Zulpilip, malam ensana.

Ketuai Pemesai Eksekutif Suara Sarawak Dr Jeniri Amir madahka media nya dibantaika nengah tiga bengkah pelasar iya nya chetak, portal lalu ke baru, e-paper.

“Kami pechaya nengah pelasar tu, kami ulih nagit mayuh agi orang ke deka macha enda ngira sekat geopolitik tauka jam,” ku iya.

Dr Jeniri madah munyi nya lebuh bejaku ba pengerami Makai Lemai Keterubah Suara Sarawak ba sebuah hotel tebilang ditu.

Nangkan nya ku iya, pengawa numbuhka Suara Sarawak kena 1 March 2019 tu tadi berindik ari piak sida pechaya nengeri tu agi ngemuan endur ti patut ngagai surat kabar.

“Utai ke disadang kami enda jauh limpang pengudah Suara Sarawak jampat ngerembai sereta diterima mayuh orang ke macha enda ngira bansa tauka tikas umur ba nengeri tu.

“Tu mandangka Suara Sarawak mayuh meri isi editorial ti engkeman enggau pinta sereta gaya orang ke macha seriris enggau prinsip ‘content is king’,” ku iya.

Nambah nya ku Dr Jeniri, isi ke dibantaika dalam Suara Sarawak ngembuan mayuh gaya ti inovatif sereta dinamik lalu ngembuan infografik ti manah.

Ba lansa ke sama, iya madahka media chetak baka surat kabar mengkang ngembuan guna ti besai kelebih agi lebuh media rama mayuh mansutka penerang ti bula.

“Pekara tu enda salah baka ke diasaika kitai lebuh menua napi penanggul politik minggu tu enggau ba minggu ke udah.

“Tanggungpengawa surat kabar iya nya mansutka berita ke amat, ukai berita ti bula sereta nuduh orang sengapa,” ku iya.

Pekara ke amat ti dibantaika ba surat kabar nya mandangka prinsip bala pemberita ti ngembuan tanggupengawa ti tinggi sereta ngemeratka disiplin verifikasi, ku iya.

Kena 1 March 2019, surat kabar Suara Sarawak ditumbuhka lebuh landskap politik sereta media bukai udah berubah, lalu media selampur dunya betembung enggau pemar ti chukup besai berindik ari media rama nyentukka mayuh kompeni surat kabar bankrap.

Suara Sarawak