ARTIKEL

Sugapriya Ashok Ransing ngajar tanda klasik India

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

NGEMBUAN peneleba 25 taun ba seni tanda klasik India meransang Sugapriya Ashok, 31, muka kelas Indian Classical Dance – Bharatanatyam di Kuching.

Indu asal ari menua India Selatan nya madah, iya keran deka bekunsi penemu enggau peneleba tanda klasik bansa India ngagai mensia mayuh seraya nyagu budaya India di menua tu.

Sugapriya ti ngembuan tikas pelajar Bachelor in Technology enggau Master in Business Administration (B.Tech, MBA) madahka diri berengkah belajar tanda klasik India maya beumur enam taun.

“Aku dilatih siku guro ari umur enam taun nyentuk besai lalu kami duai suah bejalai ngiga penemu pasal seni tanda klasik India.

“Nya alai lebuh datai ba Kuching, aku ngembuan juluk ati deka muka kelas lalu ngajar nembiak rebak baru kelebih agi nembiak bansa India pasal seni tanda klasik India ke mega dikumbai Bharatanatyam,” ku iya lebuh dirandau Suara Sarawak kemari.

Ku Sugapriya, tanda Bharatanatyam tu sigi tanda asal bansa India sebedau belajar bansa tanda klasik bukai.

BESAI RETI

“Bharatanatyam tu indai tauka pun semua tanda klasik India, enti enda ulih lepas ba tanda Bharatanatyam, orang nya enda ulih nemu tanda klasik bukai.

“Nya alai, ungkup siku nembiak ti deka belajar seni tanda klasik India sida ulih belajar ari umur enam taun laban lebuh agi biak sida diajar chara ngentak kaki ti betul.

“Tanda Bharatanatyam mega siti tanda meri puji ngagai Tuhan kami, nya mega ulih nyadi tanda klasik dikena ngelalu penatai pemesai tauka ‘tanda selamat datai’,” ku iya.

Ku iya, orang ti deka belajar tanda klasik India tu mega nambah laban tanda klasik India udah diterima serata dunya.

“Tanda klasik India tu ngembuan penyelai laban ari gaya lingguk tubuh, perening mata, jari, kaki enggau kereban dikena semua nya bisi reti.

“Sida ulih enggau pekit ba renggat nasional enggau antarabansa nyema nemu nguna seni tanda klasik India ti betul,” ku iya.

NGETAN TANDA ASAL

Ngelansa pasal seni tanda klasik India di Sarawak, Sugapriya madah sebedau tu bisi orang ti ngajar nembiak India ditu pasal seni tanda klasik India.

“Tang enda memukai, bisi pekara ti nyadi lalu seni tu nadai agi diajar ngujungka nadai orang agi ngepunka pengawa nya.

“Nya alai, aku keran deka muka kelas baru awak ke nembiak ulih belajar sereta ngemerat ke main asal nya.

“Aku enggai meda tanda klasik India tu lenyau tauka padam ba Sarawak ketegal arus pemansang dunya laban bisi raban bansa India ngentapka diri ditu,” ku iya.

Indai ngagai dua iku anak nya madah, taja pen seduai melaki bini asal ari India Selatan tang seduai mutus ati ngentapka diri ba Sarawak.

“Aku deka ngentapka diri ditu, engka bisi maya aku ulih nemuai ngagai apai indai di India din, tang aku sigi deka diau ditu.

“Laki aku pen bisi ngadu dagang ba Sarawak, nya kebuah aku bisi peluang ngatur kelas lalu ngerembaika main asal ti beguna ngagai raban bansa India.

“Pemadu beguna, aku deka meri penyedar ngagai raban bansa India empu senentang pemesai reti tanda klasik enggau main asal nya,” ku iya.

Iya madah baru, naka diatu, timbal ari mensia mayuh chukup manah kelebih agi ari bansa India empu enggau orang ti ukai bansa India.

“Tekenyit aku meda bansa bukai bisi minat deka belajar tanda klasik India tu nyengkaum kereban enggau pekayan ti dikena betanda.

“Tu meh peluang ngagai aku ngerembaika seni tanda klasik India lalu ulih nyadi pelasar ngelakuka budaya kami,” ku iya.

Sugapriya merambu deka berengkah muka kelas ba bulan April tu, ninting Hari Enam enggau Hari Minggu aja.

Mensia mayuh ti deka belajar tauka betanya ngagai iya pasal seni tanda klasik India tau betelefon ngagai lumur 0177543667.

BERITA LAIN

2,000 belanda seraya ngintu rampa menua

KUCHING: Urung 2,000 penyereta ngulu program belanda pengasih besuluka jaku Run To Save Lives 4.0 ti belabuh ba mua Majlis Bandaraya Kuching Selatan (MBKS), ditu

BERITA TERBARU