KUCHING: Betong enggau Sri Aman deka nyadi nalan ngatur Lumba Malaysia (Sukma) taun baru ungkup lumba angkat berat enggau tinju.
Menteri Nembiak, Lumba enggau Pemansang Orang Dagang, Datuk Seri Abdul Karim Rahman Hamzah madah, palan nya dipilih bepanggai ngagai mayuh pekara.
“Tu nyengkaum fasiliti lumba enggau palan endur atlit bemalam ti udah nyapai lumba tikas nasional.
“Naka diatu, Betong diperambu nyadi nalan ngatur lumba angkat berat, kelimpah bisi siti agi lumba bukai laban meseti abis nadai dua lumba.
“Seraya lumba tinju deka diatur ba Sri Aman,” terang iya.
Presiden Gerempung Nembiak Nasional Bersatu Sarawak (Saberkas) mansutka jaku nya pengudah ngelanchar Pejalai Bubur Lambuk Saberkas Renggat Nengeri 2023 di Mesejit alMuhtadin, ditu kemari.
Sebedau tu, perintah udah netapka Sarawak nyadi tuai rumah Sukma edisyen Ke-21 pengudah kepenudi nyadi pengatur ba taun 2016.
Komiti Supreme Sukma ba aum diatur empai lama selubang penemu milih Sarawak nyadi tuai rumah lumba tebilang menua nya.
Ku Chairman Sukma ke mega Menteri Nembiak enggau Lumba, Hannah Yeoh, Sarawak dipilih nyadi tuai rumah ungkup edisyen 2024 bepelasar ke penemu ari bala bukai.
Sama datai Sekretari Besai Saberkas Safiee Ahmad, Adun Tanjung Datu ke mega Exco Saberkas Negeri Azizul Annuar Adenan, Sekretari Politik Premier Sarawak ke mega Mandal Presiden Saberkas Abang Abdul Aziz Abang Draup, Adun Kalaka Mohamad Duri, Adun Krian Friday Belik, Sekretari Eksekutif Saberkas Iszuan Haroni enggau Chairman saberkas Pampang Kalaka, Abadi Hussein.
