Sukung ari GPS dikena negapka PN

KUCHING: Gempung Parti Sarawak (GPS) nyukung Pakatan Nasional (PN) laban enggaika Perintah Besai enda tegap.

Menteri Dagang Dalam Menua enggau Pekara Pengguna (KPDNHEP) Datuk Alexander Nanta Linggi madah diatu GPS semina nyukung PN, tang ukai sebagi ari sida.

Ku iya, GPS enggai dibaruh perintah baka agi dipegai Barisan Nasional suba.

“GPS enda pechayaka Datuk Seri Anwar Ibrahim sereta Parti Keadilan Rakyat (PKR).

“Bakanya mega GPS suba udah suah dipejaika raban Parti Tindakan Demokratik (DAP), nyentukka sida ngemelika bala ketuai GPS,” ku iya lebuh dirandau Suara Sarawak, kemari.

Nangkan nya ku Nanta, GPS enda ibuh kasar enggau PN laban kitai nyukung sida nyadi Perintah Besai.

“Perintah Sarawak diatu udah nyamai ngulihka pemansang kediri ari Perintah Besai ke dipegai PN.

“Sida endang ari suba nundukka sukung ari kitai di Sarawak lalu tu mih maya kitai (Sarawak) bebendar ngulihka pemansang sereta kuasa ari Perintah Besai laban sida nguna sukung kitai,” ku iya nambah.

Berebak enggau nya, ba siti penerang kemari Sekretariat GPS enggau nyemetak madahka GPS siti parti politik bediri kediri ti bekerejasama enggau PN.

Penerang ke dipansutka GPS kemari semina mantaika sukung sida ngagai Menteri Besai Tan Sri Muhyiddin Yassin tang ukai sebagi ari PN.