Sukung dagang pemakai Dayak

SARATOK: Serakup Dayak Iban Sarawak (Sadia) Krian bisi perambu chara mantu peranak menua pesisir ngelakuka dagang pemakai sida ba mengeri besai.

Chairman Komiti Servis Nengah Pemakai serakup nya, Stanley Tama madahka penemu baka tu patut amat dikena nyukung dagang bansa Dayak kelebih agi bejualka pemakai asal baka dagin jani.

“Kami sebuat nguji mantu nyendiaka endur bejual dagin jani menua ari bala ditu.

“Sebedau tu sida ke nupi jani semina ulih nyual dagin ke udah dilampang sebelah genturung pendiau besemak aja.

“Bungkur makit dagang sida semina naka kandang ngelingi aja ngujungka utai dijual nadai entu laku laban kuasa meli mensia mayuh kurang.

KETUAI PENGAWA… Stanley Tama

“Nya kebuah kami bejalaika inisiatif ngerandang dagang pemakai tu ngagai mengeri besai baka Kuching,” ku Stanley lebuh dirandau Suara Sarawak.

Dikena mungkal pengawa ku iya, sida sebuat udah nempa kaul kerejasama enggau Rumah Asap Dayak Kota Semarahan ba Lot 21, Blok 26 Kampung Merdang Gayam ba pengawa nyendiaka endur bejual.

“Pengawa kami sebuat mujur amat lalu berengkah bejual kena 27 September tu tadi, Hari Lima ngagai Hari Minggu ninting minggu.

“Taja pia, enti nerima timbal manah ari mensia mayuh, hari bejual deka ditambah kelimpah nambahka bekal dagin jani menua ke dijual,” terang iya.

Stanley madahka jani ke dijual dagin umbas pemesai, urung 27 kg, laban maya tu benung perisi sereta jelan pengemuk lalu dagin ke dijual udah ditungkus manah nitihka standard makit.

BERATKA PELAJAR SEKULA… Andrew Paul

Ba lansa sama, Chairman Sadia Krian, Andrew Paul madahka tuju bukai sida deka ngiga belanja dikena nampung program Sadia Apan baka dipejalai ngelama tu.

Program tu ku Andrew ungkup nembiak sekula ba menua pesisir kelebih agi sida ke deka napi peresa besai perintah enggau nadai bebayar.

Kelimpah ari nyikap nembiak ngena penemu meretika tanya enggau chara nyaut kereta peresa ti betul, sida mega deka diembing ba chara belajar ti ngasi, mutar penanggul kusut runding enggau diperansang ngena jaku angkunka pelajar.

“Sadia Krian ulih nyaup melanja lima program dalam setaun tang ari pemanah timbal bala nembiak, pengajar enggau apai indai sepanjai 13 program ke udah diatur ngasuh kaban komiti ransing agi bejalaika pengawa.

“Naka diatu, 90 peratus ari sida ke udah ngulu program apin nemu kaul tauka pemesai guna penemu dikumbai Psikologi, Neurosains enggau Belajar Chara Ngasi ba pelajar.

“Tu tau disema baka dalam taun 80-an suba lebuh kitai apin meretika pemesai guna nembiak mit dianjung belajar ba pra sekula,” terang iya silik.

Tambah mega ku iya, penemu enggau penerang dikunsi ba program nya nadai ba silibus sekula primari enggau sekondari tang suah dikena nembiak ke diau ba mengeri besai baka Kuala Lumpur.

Ku iya, tu nyengkaum sekula pintar baka Maktab Rendah Sains Mara (MRSM) ti bekungsika penemu baka tu ngagai bala nembiak ke alai sida jampat meretika pelajar.

Tu nyadika peransang kami ngatur Program Sadia Apan pulai pemaik raban diselinting, ngichaka nembiak ba menua pesisir bela ampit penemu baka bala bakih ba mengeri besai, tandu Andrew.

Ngelansa pasal pejalai Program Servis Komuniti Nengah Pemakai, Andrew madahka rega dagin jani ke dijual bisi mar mimit ari rega ba makit tang agi murah ari rega makit besai lalu rega nya ulih ditangkup mensia mayuh ke diau sebelah mengeri.

“Asil dagang tu ila deka dibagi ke alai 20 peratus ungkup bejalaika Program Sadia Apan.

“Nya kebuah dagang tu digelar kami sebuat Servis Komuniti Nengah Pemakai laban mensia mayuh ke bisi meli dagin jani menua tu mega besaup melanja program peransang pelajar ke diatur Sadia Krian,” ku Andrew madah nyemetak.

Andrew ngarika sida sebuat meri besai terima kasih ngagai Raban Rumah Asap Kota Samarahan enggau bakih benama Ling Julai ti udah nyukung pengawa sida dataika mujur.

 

MERI KEREJASAMA… Ling Julai