Sukung kimpin meri darah

MIRI: Mensia mayuh diperansang datai meri sukung maya Kimpin Meri Darah ba Kompleks Besai Bebelika Barang Boulevard ditu kena 15 Disember tu.

Program diatur Kaban Komiti Ngatur Pengawa Meri Darah Serakup Bulan Sabit Merah Malaysia (PBSMM) Daerah Miri begulai enggau Kelab Lion Miri Mandarin, Serakup Indu Dayak Sarawak (SIDS), Serakup India Miri, Serakup Berawan Sarawak enggau Komuniti Pemindahan (MC).

Nitihka penerang, kimpin tu deka berengkah urung pukul 9 pagi nyentuk 1 lemai.

Chairman Pengatur Kaunsilor Karambir Singh madah, tuju kimpin tu nentuka bekal darah chukup sepanjai timpuh kemisi hari besai Krismas taun tu.

“Ba kimpin serak tu, kami nagit 80 pain darah dikena nangkup peminta sepital musin hari besai.

“Kami mega ngarapka sukung mensia mayuh mantu nambahka bekal darah ba Bank Darah Sepital Miri,” ku iya.

Iya madah, sepenyampau 8,000 pain darah diguna kena nangkup peminta Sepital Miri ninting taun.

Penerang silik pasal kimpin nya, mensia mayuh tau betanya ngagai Karambir Singh ngena lumur 0168785500.

Suara Sarawak