Sukung peminat lagu Redak Seribu enda disadang – Masterpiece

RABAN Masterpiece udah ngeluarka lagu baru baru nengah pelasar media rama ungkup bala peminat ti lama udah nganti single baru ari raban tu.

Kena 16 April tu tadi, raban Masterpiece udah ngeluarka single baru Redak Seribu nengah Youtube Channel Depha Masterpiece enggau udah diped lebih ari 80,000 taja baru tiga hari dikeluarka nengah Youtube nya.

Penyampau lagu tu udah dipeda nunjukka leka enggau tiun lagu tu diterima mensia mayuh kelebih agi peminat ti nganti lagu baru ari raban Masterpiece.

Redak Seribu tu ngembuan reti ti dalam enggau bisi cherita dalam lagu ngambika bala peminat enggau bala peninga ulih ngasai sereta meretika leka lagu dikenataika ba dalam lagu tu.

“Lagu tu nusui pasal pemanah enggau pengerindu ti enda dikenang ngujungka ati anchur laban pemanah sereta pengerindu nya enda dibalas ti tau ngasuh tuju redak seribu,” terang Depha Masterpiece.

MERINDANG… Depha merindang bala peminatlebuh Konsert Masterpiece Merindang Ke Bintang 1 Dekad di Stadium Tertutup Sibu.

Lebuh dirandau pasal lagu pemadu baru ari raban Masterpiece tu, Depha madahka lagu Redak Seribu tu pemadu lama ditengkebang iya laban udah lima kali diubah ari sukut struktur kelebih agi ba Chorus enggau muzik lagu tu empu ba gitar solo.

“Lagu tu entara lagu pemadu lama ditengkebang aku enggau leka lagu tu bisi ngena jaku Iban dalam baka gauk, jelan enggau muntang ngambika jaku Iban majak dikerindu enggau bala peminat nemu reti lagu tu.

“Aku ngarapka lagu baru ari raban Masterpiece tu ulih diterima bala peminat ba selampur menua enggau nyukung pejalai seni muzik kami,” ku Depha, siku ari raban Masterpiece ti udah nengkebang leka lagu Redak Seribu tu.

TIMBAL ENDA DISADANG

“Nambahka nya, kami enda nyangka lagu tu udah dipeda manggai 80,000 lalu kami gaga amat lagu tu ulih diterima bala peminat semua kelai sida udah nyukung lagu pemadu baru ari raban kami ba taun 2020 tu.

“Pemujur diasaika kami ngelama tu bepun ari sukung enggau utai dikerinduka semua raban Masterpiece laban semua kami rinduka pengawa belagu enggau merindang sereta rinduka bidang muzik kenyau ari sekula suba,” terang iya.

Bisi tujuh iku kaban dalam raban Masterpiece tu iya nya Willy (ketuai raban Masterpiece enggau nyadi guitarist asal ari Kanowit), Kent (menyadi Willy, pemain gitar enggau vokalis bepadu nyawa enggau Depha ba sekeda lagu Masterpiece, asal ari Kanowit), Harold (pemain dram asal ari Kanowit), Marcus (pemain gitar bass ari Salim Sibu, Rosli (pemain keyboard enggau piano, asal ari Sukun Sibu), Valentine (pemain keyboard ari Kanowit) enggau Depha (penengkebang lagu enggau vokal, asal ari Kapit).

“Sekumbang merindang ba selampur menua tu, mayuh kenang manis enggau pait kala diasaika kami sebuat laban lebuh ngepunka raban tu, umur kami agi biak magang enggau maya nya aku baru beumur 25 taun lebuh keterubah iya begulai enggau raban Masterpiece.

“Pia mega, kami suah merindang kin kitu enggau lebuh rekuding album keterubah, kami mindah kin kitu ari Sibu ngagai Kuching ngambi rekuding lagu ba sebuah studio di Kuching dalam taun 2008.

“Kami sebuat mega bisi ngasaika cherita ke sinu enggau ngasuh geli ati lebuh tayar kerita kami panchit enggau Masterpiece suah diau ba hotel mit, diau bemalam ba siti bilik enggau kala enda dibayar lebuh merindang,” ku iya nerang sentang utai kala diasaika sida sekaban.

“Utai ke kala diasaika kami tu ngasuh kami meretika dunya pemerindang enggau ransing agi merindang bala peminat ba menua tu ti rindu enggau nyukung lagu dikeluarka kami tu.

KENANG KAMI… Semua raban Masterpiece.

“Kami sekaban rindu ninga lagu hard rock enggau meta; baka lagu ari raban Search, Wings, Scorpion, Metallica, Hallowen, Bon Jovi enggau ke bukai laban tiun lagu baka mayuh manah sereta rindu didinga kelebih agi bala nembiak jeman diatu.

Ungkup penerang semua, raban Masterpiece udah ngeluarka lima album iya nya Merindang Ke Bintang ba taun 2009, Rock & Roll (2013), Ngap Sayot (2014) enggau Ensera Paragon (2018) lalgu single baru, Redak Seribu (2020).

LANSA BA DUNYA PEMERINDANG

Album Merindang Ke Bintang dikeluarka ba taun 2019 udah dichelak tiga kali laban sukung ari bala peminat enda disangka ngujungka album tu menang enam anugerah muzik Dayak ba taun 2010.

“Kami enda nyangka amat lebuh nerima mayuh sukung bala peminat ngujungka kami nyelak album tu tiga kali enggau menang enam anugerah lebuh nya.

Berebak enggau nya, raban Masterpiece madahka industri muzik Dayak udah ngasaika ubah muzik nitihka singkang pemansang dunya ari lagu asal enggau kontemporari, joget, dangdut engau balada, udah berubah ngagai genre muzik bukai baka muzik rock, alternative, EDM, rap enggau Indie.

“Muzik ba menua kitai tu mega berubah nitihka pemansang muzik kemaya hari kelebih agi ari sukut kualiti produksi enggau studio sereta muzik video,” ku siku ari pengari raban Masterpiece.

“Nambahka nya, mayuh rebak biak biak landik belagu ngujungka muzik kitai makin mansang enggau lebuh ngaga promosyen, mayuh pelasar ulih dikena kitai baka nengah stesyen radio menua enggau surat kabar kelimpah pelasar media rama baka Youtube, Facebook, Instagram enggau ke bukai.

“Lagu iban ditengkebang kami tu laban deka ngangkatka jaku Iban sebaka enggau jaku bukai taja ngena genre bebida nitihka buah penemu ari raban Masterpiece empu ngambika jaku kitai majak dikerindu bala peminat nitihka genre lagu nya empu.

Nama raban Masterpiece mega majak tebilang enggau dikelala ba serata dunya kelebih agi bala peminat ti rinduka genre muzik dikenataika raban tu kelimpah bulih mayuh anugerah dalam industri muzik Dayak.

Entara anugerah ti kala diempu raban tu iya nya Anugerah Raban Pemadu Tebilang lebuh Anugerah Muzik Dayak (AMD) taun 2010, Anugerah Klip Video Pemadu Manah (AMD 2010), Anugerah Album Pemadu Manah (AMD 2010), Anugerah Artis Baru Pemadu Nyulut (AMD 2010), Anugerah Lagu Pemadu Manah lebuh Anugerah Juara Rentak Ruai (AJARR) CatsFM (2011) enggau Anugerah Pemerindang Pemadu Manah lebuh Anugerah Carta Siapa Juara (ACSJ 2014.

Nambahka nya, anugerah bukai ke kala dipenggi raban Masterpiece iya nya bulih lumur dua enggau Anugerah Pemerindang Pemadu Manah ACSJ 2017, Anugerah Vokal Beraban Pemadu Manah (AMD 2016), Anugerah Pemerindang Kategori Beraban Pemadu Manah enggau nerima dua kali Anugerah Artis Rock Pemadu Manah lebuh AMD 2014 enggau 2016.

PEMAR INDUSTRI MUZIK DAYAK

“Jeman diatu, enda tentu mayuh pemar ditapi bala pemusik ba menua tu, enda baka lebuh kami merindang ba industri tu suba laban mayuh pelasar diatu ulih dikena ngelakuka lagu kelimpah Masterpiece udah bisi studio kediri empu iya nya Masterjam studio,” ku iya.

Berindik ari nya ku iya, sekeda piak mega udah bejalaika pangku pengawa sida kelebih agi piak stesyen radio enggau surat kabar kami mantu ngemansangka agi industri muzik Dayak ngagai tikas ke tinggi agi.

“Ba penemu aku, kami agi begunaka mayuh agi anugerah muzik baka suba kelimpah begunaka sukung enggau belanja ari piak bekaul ngambi mantu kami ngangkatka seni muzik Dayak enggau meri peransang ngagai bala artis mantaika pengelandik sida merindang.

Ku iya, anugerah tu kelai industri tu udah nyukung enggau ngaku pemanah sereta genre muzik ari bala penanyi enggau pemuzik di menua.

“Kelimpah rindu belanja, kitai bisi tuju bukai lalu anugerah muzik ti besai reti nya sebagi ari pelasar tauka chara ke engkemanh ungkup bala artis ngerembaika agi nama enggau lagu sida, ukai semina ba menua tang ngagai menua bukai.

Nya kebuah, muzik Dayak patut dikerembai nengah mayuh genre muzik ngambi dunya pemerindang ti menua tu dikerembai ngagai tikas ke tinggi agi enggau dikelala bansa bukai.

“Meri besai terima kasih ngagai bala peminat, diri sebilik enggau bala bukai ti udah ngemujurka pengawa ngeluarka single baru ari Raban Masterpiece tu.

“Kami berasai lantang ati laban semua bala bakih enggau diri sebilik semampai nyukung pejalai seni kami kenyau hari keterubah merindang bala peminat ba menua tu.

Terang Depha, sukung bala peminat, diri sebilik enggau bala bukai tu ngasuh sida sekaban ransing agi merindang enggau nengkebang lagu ungkup semua.

Kelimpah ari nya, sukung enggau sanding penemu bala bukai mega ngasuh kami ransing agi belajar enggau mansang ke bukai setipak enggau seni muzik kemaya hari.

“Kepenudi iya, sukung mih industri muzik Dayak ngambi bala penanyi ba menua tu ulih besemekih enggau bala bukai sereta muzik Dayak majak diterima enggau dikelala ngagai tikas ke tinggi agi.

Sukung bala peminat tu deka meransang kami nengkebang enggau mantaika mayuh agi lagu nengah genre bebida ngambika industri kitai majak mansang enggau tebilang sebaka enggau lagu ari menua bukai.

“Terima kasih ngagai semua piak kelebih agi direktor video iya nya Sydney Atin laban udah ngaga video lagu Redak Seribu tu,” ku iya.

Suara Sarawak