Sukung pengari ti enda bula ke rayat

SPAOH: Bala pengundi sitak DUN Bukit Saban diperansang terus meri sukung ngagai Gempung Parti Sarawak (GPS) maya pengawa bepilih nengeri (PRN) ti ka datai tu ila.

Sapit Kepala Menteri Datuk Amar Douglas Uggah Embas madah,pengundi DUN Bukit Saban meseti nyukung pengari sida ari GPS lebuh datai maya alai sida nunjuk ke sukung sida ila.

Ku iya,tu bepelasar ari langgur enggau pelin pemansang ti chukup mayuh deka enggau iya ke udah digaga ngelama tu.

“Parti GPS iya nya parti ti merintah menua Sarawak endang semampai siru sereta nemu utai dikedeka rayat menua tu kenyau ari suba-suba,”

“Tambah mega enggau peneleba Kepala Menteri Datuk Patinggi Abang Johari Tun Openg ke udah 40 taun ba dunya politik nya alai iya nemu bakani deka ngatur pemansang sereta chara begiga belanja kena ngemansang ke menua enggau rayat,”ku iya.

Datuk Amar Douglas Uggah Embas ke mega Menteri Pekara Wang Kedua madah munyi nya lebuh bejaku rambau Bejadi Program Sarawak Kitai Empu ba Dewan Mensia Mayuh Spaoh pagi tadi.

Nangkan nya ku iya, parti perintah Sarawak (GPS) enda kala ngemula ke rayat menua tu lalu semua nya ulih dipeda rayat empu diatu.

“Pengudah pengawa bepilih besai tu tadi (PRU 14), kitai udah meda pemayuh projek bebesai ungkup Sarawak dikinsil perintah pakatan (PH) baka projek jematan, skim betanam sawit enggau mayuh bantu ke bukai,”ku iya.

“Bisi sekali suba maya kimpin kitu (Sarawak),siku ketuai parti ari Semenanjung bejaku ba mua mayuh madah,sehari tu menang bepilih pagila rega minyak ulih nurun ngagai RM 1.50,”

” Pia mega bisi siku agi kaban parlimen Pakatan Harapan ari Sarawak empu pan kala madah enti menang sereta ulih nyadi Perintah Menua, chukai (royalti) minyak 20 peratus deka diberi ngagai Sarawak,”

“Diatu kita meda bisi semua utai nya kini?,”ku iya nuju ke tanya nya ngagai mensia mayuh ti bisi datai seraya disaut bala mayuh enggau leka jaku ‘bula iya nya’.

“Nya alai pemulai kita ari tu, tesau semua peranak ti udah tau muai undi tang bedau ngerejista nya asuh rejista nama sida nyadi pengundi lalu padah nuju sida ni bagi Parti ti patut disunting ila,”ku iya.

Sama datai ngulu program, bisi Uggah iya nya Datin Amar Doreen Mayang, Kaban Parlimen Batang Lupar Datuk Rohani Abdul Karim, Kaban Parlimen Batang Sadong Hajah Nancy Haji Sukri, Kaban Parlimen Betong Datuk Robert Lawson Chuat, Adun Layar Gerald Rentap Jabu enggau Kaban Parlimen Kota Samarahan Hajah Rubiah Haji Wang ke mega Chairperson program sarawak kitai empu tikas nengeri lalu disempulang Ketuai Pampang Parti enggau Ketuai Raban Bansa.

Suara Sarawak