KUCHING: Program belanda Run for Peace 2023 ti diatur Soka Gakkai Malaysia (SGM) Pampang Sarawak diatu datai baru sereta dipasuk urung 9,000 penyereta.
Pengudah tiga taun tejanggal ketegal pengerekai pandemik COVID-19, program angkunka pengelikun nya deka diatur baru ba bulan Julai tu ba Kuching, Sibu enggau Miri.
Komiti pengatur, Linda Lam madah, program nya diatur dikena ngelakuka gaya pengelikun enggau pengelantang dalam komuniti.
Ku iya, program nya mega dikena nyukung inisiatif pemeruan dunya seraris enggau Juluk Pemansang Meruan (SDGs) Serakup Bansa Besatu (PBB).
“Ba bulan Julai tu, urung 70,000 penyereta deka ngambi bagi ba program belanda tu ti deka diatur ba 23 palan ba selampur menua.
“Ba Sarawak, program tu deka diatur ba tiga palan baka Majlis Bandaraya Kuching Selatan (MBKS), Kuching kena 2 Julai sereta 9 Julai ba Sibu enggau Miri,” ku iya ba aum pemberita, ditu kemari.
Ngelansa silik, ku iya, program nya nyendia dua kategori baka lima enggau tujuh kilometer (km) lalu bayar masuk iya nya RM30 siku.
“Naka diatu, kami udah nerima lebih 1,000 penyereta ba Kuching lalu haribulan kepenudi masuk program tu iya nya 31 Mei tu.
“Taja pia, kami nyelinting urung 5,000 penyereta ba Kuching lalu Sibu enggau Miri kami bela nyelinting 2,000 penyereta,” ku iya.
