Sukung program main asal ngambi seruran pegari

KUCHING: Akademi Sarawak Dayak Iban Association (Asadia) mengkang chakah mai mensia mayuh ngemeranka pengawa ngetan main asal bansa Iban.

Ketuai Asadia Mabong Unggang madah, sepemanjai taun 2019 nyentukka diatu, program sida endang nerima sambut ke manah.

“Pia mega ba taun 2020 ti deka datai, aku ngarapka program main asal mengkang nerima sambut ke manah ari mensia mayuh ngambika main asal kitai seruran pegari belama,” pia ku iya madah ngagai pengarang berita, empai lama.

Dulu agi ari nya, iya ngulu pengawa tamat Kelas Ajat Lelaki (17 iku penyereta) enggau Indu (23) sereta Kelas Betabuh (enam), Kuntau (lapan), Sape enggau Belikan (lapan).

Nerangka pengawa nya, Mabong madah, pengawa nyuaka setipikit tamat deka diatur kena 5 Oktober ti deka datai.

“Pengawa tu ila deka dipenyadika Kaban Kunsil Nengeri (Adun) Layar Gerald Rentap,” ku iya madah baru.

Ba Kelas Ajat Lelaki, ku iya, kelas nya mujur matak mensia mayuh baik nya tuai tauka biak.

“Kelimpah ari nya, kitai mega bisi ngajar sida chra ngena ngepan lelaki baka sirat enggau gagong.

“Ngarapka kelas ke diatur Asadia tu majak nerima sambut ari bala mayuh ti bela ransing ati ngetanka main asal bansa diri,” pia ku iya madah.

TANKA MAIN ASAL: Mabong (tengah) enggau pengajar kelas ngajat Henry Guya (tiga kiba) begambar begulai enggau penyereta Kelas Ajat Lelaki, empai lama.

 

LANDIK…Siku penyereta kelas ngajat benung mandangka pengelandik ngajat ngagai bala bukai.

Suara Sarawak