Sulam Keringkam pesaka asal Melayu Sarawak

KUCHING: Berengkah nyulam keringkam suba ungkup kena diri empu tang diatu nerima timbal ukai semina dalam Malaysia aja, tang mega ari menua luar.

Nampung pengelandik nyulam ari niang indai iya, Salbiah Muhi ngangkatka pengangkun nyulam keringkam kenyau ari taun 1976 nyadi penatai pemisi iya empu sereta beratka kualiti nempa dagang keringkam beretan nyentuk diatu.

Ku Salbiah, terubah bisi ati angkun pengudah meda niang indai iya nyulam keringkam, nyau kelama iya labuh pengerindu lalu nampung pengawa nya dataika sehari tu.

“Aku berengkah nyulam pemuas ngemata niang indai nyulam keringkam, aku lalu nguji, udah nya nyau rindu amat.

“Terubah suba aku semina nyulam kena diri empu aja, tang pengudah orang meda pengalus sulam aku sida lalu ngudar dataika nerima timbal manah amat nyentuk diatu,” ku iya nerang.

PRODUK… Salbiah Muhi mandangka produk ti bisi dijual iya ba bangsal Sazalia Warisan Craft diempu iya, kemari.

Sulam keringkam ngena ubung emas ti bisi rega tinggi ba makit enggau semua disulam ngena jari atas kain kasa rubia.

Pia mega ku Salbiah, lebuh mungkal dagang suba puku dikena iya urung RM1,000 laban rega ubung emas rambau nya urung RM45 aja tang diatu rega iya manggai RM180 sama enggau 16 meter tauka sekepala.

“Puku dipansutka aku suba enda kelalu besai laban rega kereban ti dikena mudah kelebih agi ubung emas.

“Ungkus dikena meli ubung emas aja diatu aku mansutka belanja manggai RM5,000 nyengkaum bekal disimpan enggau dikena nyulam udar orang,” ku iya nerang.

Keringkam tu siti ari pesaka Melayu Sarawak ti ngembuan rega iya empu. Rega Keringkam dijual bepelasarka pemesai enggau langkar sulam ti ulih dijual ngena rega RM1,000 sereta tu manggai bepuluh ribu ringgi.

ALUS… Zainap Muhi, menyadi Salbiah nyulam keringkam ba bangsal Sazalia Warisan Craft, kemari.

Ku Salbiah, iya nyual keringkam nitihka pemesai enggau langkar ti dipinta sida ti ngudar, enti selayah mit mimit disbanding enggau selampai ti panjai.

“Aku nyual keringkam tu nitihka pemesai enggau langkar enti iya mit enggau langkar enda ngena mayuh ubung emas, aku deka nyual ngena rega ti baruh mimit.

“Rega keringkam dijual aku diatu berengkah ari RM1,000 nyentuk RM10,000 nitihka langkar enggau pemesai ti diudar sida,” ku iya.

Salbiah majak chakah ngaul diri ba pengawa mandangka Kraf Jari Malaysia pengudah bulih lisin dalam taun 2011 lalu iya nyereta pengawa nya datai ba Semenanjung sereta kala ngemai keringkam ngagai menua luar enggau kala nerima beberapa anugerah ari perintah menua.

Apin lama ke udah iya enggau menyadi iya, Zainab Muhi ti mega ngembuan pengelandik nyulam keringkam nerima anugerah ari Opis Menteri Dagang Temuai, Seni, Main Asal, Nembiak enggau Lumba nyadi Sarawak Living Legendary of Keringkam Gold Emboidery kena 15 Mac tu tadi.

TANDA BASA… Salbiah enggau Zainap Muhi nerima anugerah ari Opis Menteri Dagang Temuai, Seni, Main Asal, Nembiak enggau Lumba nyadi Sarawak Living Legendary of Keringkam Gold Emboidery kena 15 Mac tu tadi.

Salbiah nadai niat dagang keringkam iya mekit sebarang raban, tang iya lantang enti bisi orang bukai ngembuan pengelandik sebaka laban tu pesaka lama Melayu Sarawak ti enda tau punas.

“Ba dagang tenun keringkam tu begunaka kerejasama, kitai meseti liat ati, puh enggau anang jampat leju ba pengawa dikereja.

“Dagang tu endang bisi untung besai tang ukai datai tekala nya. Dagang keringkam tu begunaka timpuh panjai deka meda untung iya,” ku Pedagang Keringkam tu.

Salbiah begunaka timpuh sebulan nyentuk dua bulan endur tembu nyulam keringkam ti diudar orang. Tu bepanggai ba pemesai enggau langkar ti dipinta sida sereta iya ngemeratka sida tu tepantup ati meda asil sulam.

Kenu ku iya, taja nyulam keringkam nyadi penatai pemisi ngagai iya, tang pengerai meruan dikemerat kelebih agi umur nyau manggai endar. Taja pia, enti bisi sida minta udar digaga jampat, iya naka ulih nguji nembuka udar nya.

“Nyulam keringkam tu begunaka timpuh sebulan ngagai dua bulan lalu enti langkar penuh enggau besai deka manggai empat ngagai lima bulan tembu.

“Tang enti bisi sida minta sulan tembu enggau jampat sereta langkar dipinta enda penuh, aku deka naka ulih nembuka udar baka ti dipinta,” ku iya nambah.

Salbiah nyulam keringkam tu begulai enggau menyadi iya Zainap Muhi, beumur 57 taun lalu diatu anak indu iya, Norhajiah Osman, 34 taun bela nampung pengelandik nyulam keringkam tu.

Kemaya hari bemacham produk dijual bepelasarka keringkam lalu iya mega nyual suyuk enggau bemacham barang ari kain tenun keringkam.

Udar diterima Salbiah ti ngena chap dagang Sazalia Warisan Craft ukai semina ungkup pengerami melah pinang aja tang bisi ngudar nyadika tepa sereta ulih matak ati temuai ari luar.

Salbiah ngarapka pesaka keringkam Melayu Sarawak tu enda diseruyut jeman enggau pengelandik ti ditampung ari indai iya ditampung ngagai anak iya empu nyengkaum bala nembiak diajar iya sereta rebak biak ti ulih ngangkatka nama keringkam.

Iya mega ngarap dagang keringkam dipejalai ngelama tu deka maju agi sereta ditampung bala anak ti nampung pengawa iya jemah.

Suara Sarawak