SULLIVAN : Album baru pansut 2021

SULLIVAN ‘Mati Idup Baru’, engkeman dikena mandangka ‘penatai’ baru raban tu ba panggau pemerindang dunya muzik Iban.

Ngepunka rintai ngelansa penumbuh SULLIVAN, keterubah raban tu ditumbuhka ba taun 2011 enggau lagu keterubah sida ‘Simpan Mih’.

Raban sida dikelala enggau nama Eerie ti nyadi ‘vokalis’ ti mega ‘komposer’ ditangkan Mike (Bass Guitar) Raffel (Keyboardist), Stanley (Guitaris), Joners (Guitaris) enggau Jude (Drummer).

Kelimpah ‘Simpan Mih’, SULLIVAN datai enggau lagu ‘Ketegal Nuan’ ba taun 2012 ditangkan ‘single hit’ iya nya ‘Bakani’ dalam taun 2013 sebedau ba taun 2016-2017 sida ngeluarka album keterubah ‘Pengerindu Lama’.

Sebedau ngerintai ke lebuh agi, Eerie peranak asal Kapit diatu gawa ke tasik lalu Mike ti mega datai ari Kapit gawa enggau Astro Kuching.

Raban Sullivan benung merindang mensia mayuh ba sebengkah pengawa merindang.

Raffel ari Sebuyau gawa ba TM Kuching, Stanley ari Bau benung nampung pelajar ba UPSI di Perak, Joners ari Bintulu gawa di Kuching lalu ditangkan Jude peranak asal Kuching mengkang gawa enggau TM.

“Taun keterubah ditumbuh, kami ngepunka diri enggau lagu ‘Simpah Mih’ sebedau ba taun 2017 kami berasai temegah ati ngeluarka album ‘Pengerindu Lama’ ba taun 2017.

“Ba pemujur nerima gelar, SULLIVAN kala bulih Anugerah Muzik Dayak (AMD2014) enggau nyadi finalist Anugerah Carta Sapa Juara 2015.

“Tang ba AMD 2016, kami mujur megai gelar Best Indie Rock band 2016, Best Cover album enggau Best Muzik Video 2016,” pia ku SULLIVAN maya berandau enggau Suara Sarawak, kemari.

Nambahkanya, raban tu mega kala merindang ba panggau besai nyerumba program dagang temuai Kuching iya nya ‘What’s About Kuching ba taun 2017 enggau 2018.

Raban Sullivan benung merindang mensia mayuh ba sebengkah pengawa merindang.

Baka ‘band’ bukai mega, pejalai SULLIVAN bela enda teseliahka macham penguji. Tang ari semua nya, raban tu majak kering ayan ba panggau industri musik Iban menua tu.

“Penusah, penguji enggau pemar ke ditapi kami enda ulih ditiap enggau jari. Pia mega bisi tibak pejalai kami pait, manis endang kala diasaika kami sebuat magang.

“Engka mayuh bala udah nemu SULLIVAN tu ukai raban ke lama suba laban bisi nya udah mai pejalai pengidup diri empu.

“Diatu semina Eerie enggau Mike aja orang lama dalam ‘band’ tu,” ku raban tu madah.

Ari semua nya, pengingat ke semampai dikenang iya nya tiap kali sida deka ngemansutka lagu baru, sida enda ulih ngelarika diri ari ti ngenangika lagu nya deka diterima mensia mayuh ke enda.

“Kebuah pia laban ubah pengingin ‘peminat’ diatu enda baka suba. Raban kami sigi semampai nguji mai ‘genre’ bepelasarka ‘rock and roll’ ba semua lagu ti deka dipansutka kami enda ngira nya ‘slow-rock’, ‘ballad-rock’, ‘hard-rock’ tauka baka ke diatu kami nguji mai konsep ti tusah agi iya nya ‘Heavy Metal'”.

Enda nyalam pengesal ati maya bepekit, SULLIVAN madah, pengingat ba dunya pemerindang endang mayuh tang enda telebihka maya bepekit ba Anugerah Carta Sapa Juara Ke-3 maya pekit nya diatur di Betong ba taun 2016.

“Maya nya, mayuh ‘band’ ti tebilang datai magang. Pia mega artis ‘solo’ endang mayuh ditemu pegari ba industri musik kitai.

“Ukai semina nya, ba AMD 2017, kami besemekih enggau raban tebilang baka Masterpiece, Majestica enggau Loudness Empire ba kategori ‘Best Live Band Performance,”.

Baka pun, diatu mega raban tu mengkang ngelempaika peninga nyadi pengering ayun sikang sida.

Ketegal nya, sida besemaya naka alah nengkebang lagu pemadu manah ngagai bala peninga ti ngelama tu enda kala pungkang nyukung sida sebuat.

“Ketegal peninga kami endang bisi perambu deka nengkebang lalu ngadu mansutka album baru ba taun 2021 ila.

“Nya ukai semaya aja tang ‘pemeri’ kami ngagai bala peninga,” pia ku sida madah.

“Kepenudi, SULLIVAN enggau jaku ensuruk meri terima kasih ngagai semua enda ngira biak tauka tuai, sukung ari kita semua ngasuh ati kami majak ransing nengkebang lagu ungkup industri musik kitai di Sarawak.

“Pia mega, arapka semua bala kaban artis ke bukai, kitai semua bela ulih ngangkatka industri muzik kitai Iban jauh agi ba renggat antarabansa dudi hari ila, ku iya nutup jaku enggau penuh pengandal.

Suara Sarawak