SIBU: Nasip sida ke tasah angus ba Rumah Norliza Umpang, Sungai Menyan di Jalai Nibong-Tada terus nerima perati ari Parti Sa’ati Rayat Sarawak (SUPP) Pampang Dudong.

Chairman iya, Kaunselor Wong Ching Yong madahka sida deka mantu ruang bilik nya ngulihka bantu agih belanja ari Opis Pelilih Sibu.

Ku iya, tu nentuka ruang bilik nya ngaga baru rumah sida ti angus kena lemai Hari Empat tu tadi.

“Nitihka penerang, bisi enam buah bilik karam ba darat. Raban kami diarika Tuai Unit Bumiputera SUPP Pampang Dudong Penghulu Paing Tawi udah betemu, nanyaka berita sereta betatika nasip sida ti karam ba darat kena Hari Lima tu tadi,” ku iya.

Wong ke mega Sapit Chairman Majlis Daerah Luar Bandar Sibu (MDLBS) madah, Paing mega ngarika SUPP Pampang Dudong nyuaka pemeri ti diterima Tuai Rumah Norliza ngarika sida serumah.

Ku iya, Paing mega nyuaka bantu pemakai kelimpah ari belanja.

“Nasip amat penusah angus tu enda nganguska semua rumah peranak Rumah Norliza lalu tujuh buah bilik nya sepiak rumah panjai Rumah Norliza tang agi dipegai Tuai Rumah ke sama semina nadai betampung aja.

“Sebuah agi bilik semina angus 20 peratus seraya enam bilik agi angus lengis,” ku iya nerang.

Ba penusah ke nyadi lemai 7 julai tu tadi, tujuh buah bilik dipegai Tuai Rumah Norliza angus.

Urung 25 iku peranak ari tujuh buah bilik nya angus tang nadai penusah bebadi nyawa diripot laban semua peranak mujur nyelamatka diri.