SUPP semampai nerima pemulai Jerip

KUCHING: Menteri Muda Pengelantang Komuniti Datuk Francis Harden Hollis madahka pemutus Kaban Kunsil Nengeri (Adun) Datuk Jerip Susil nyurutka diri ari Parti Sarawak Bersatu (PSB) tekala nya Hari Empat tu tadi endang ari pemutus digaga Jerip empu.

“Pemutus tu endang datai ari Jerip empu laban sebedau tu iya mega kala dipinta pulai baru ngagai Parti Sa’ati Rayat Sarawak (SUPP).

“Naka diatu mega kitai meda mayuh ningkilka diri ari PSB ti nadai entu nyenggala kebuah laban nadai dipadah nyemetak.

“Kini kuing Jerip udah tu lalu ni bagi parti ti deka disereta, ba penemu aku, iya patut nyemilik Gabungan Parti Sarawak (GPS) laban gempung parti tu megai Perintah Sarawak diatu,” ku Harden.

Harden mansutka jaku tu lebuh dirandau pemberita pengudah Pengawa Nyuaka Tanda Basa Volunteer Bakih Strategik Opis Pengintu Pengelantang Mensia Mayuh (JKM) ditu, malam ensanus.

Ku iya, nyadi Tukang Wang SUPP, iya enggau bala kaban bukai bela nerima pemulai sida ti deka sebilik baru enggau parti nya.

“Enti sema iya (Jerip) deka nikal pulai ngagai SUPP, kami endang nerima enggau ati lantang.

“Pintu parti mega semampai ditukang ukai semina ngagai Jerip aja tang mega ngagai bala kaban bukai, segulai sejalai baru ba ruang bilik (SUPP) kitai tu,” ku Harden madah nyemetak.

Datuk Francis Harden Hollis