S’wak belajar ari sejarah

SERIAN: Parti GPS enda rebah ngapa laban mayuh belajar ari peneleba ke dulu.

Kepala Menteri Sarawak, Datuk Patinggi Abang Johari Tun Openg madahka GPS udah belajar ari sukut politik enggau ngatur pengawa kenyau ari 1963 agi.

Ku Abang Johari, rampa politik di Malaysia udah berubah kenyau ari PRU14 ngujungka GPS ningkilka diri ari BN.

Ku iya, gaya politik dikemeran ba Semenanjung enda meruan deka ngeruga pengelantang rayat Sarawak.

Nya kebuah ku iya, pengawa numbuhka GPS tu ngemerat enggau negika hak Sarawak enggau peranak iya.

LANCHAR… Abang Johari begulai enggau sapit iya, Datuk Amar Douglas Uggah Embas sereta sekeda temuai dipebasa bukai lebuh ngelancharka tambai GPS ba Zon 4B di Dewan Tayung Langui Kampung Pichin, Serian kemari. – Gambar NADIM BOKHARI.

“Semina rayat Sarawak aja ulih ngemansang enggau ngemai Sarawak maju.

“Kuing Sarawak nyenggal agi di baruh pegai GPS ti ngemeratka hak Sarawak,” ku iya madah nyemetak.

Iya mansutka jaku nya lebuh ngelancharka tambai GPS ba zon 4B di Dewan Tayung Langui Kampung Pichin, Serian tadi.

Ku iya, Sarawak deka maju enggau mansang datai ba taun 2030 seriris enggau ‘kar jalai’ ekonomi digital.

Ku iya, semua infrastruktur teknologi diseleti setipak enggau pengerembai teknologi maju kemaya hari.

Kaunsil Multimedia Sarawak (SMA) udah ngagihka RM1 billion dikena ngemetul enggau ngemanahka pengelemi teknologi baka tiang telekomunikasyen ti bisi ditu.

Perintah Sarawak di baruh GPS mega nyilih tanggungpengawa projek ti dikinsil Perintah Besai baka nyeleti sekula repuk enggau ngaga Jematan Batang Lupar.

“Kitai enda ibuh nagih ari Perintah Besai laban Perintah Sarawak menggi tanggungpengawa ngemansangka menua tu kelebih agi kandang menua pesisir,” ku iya.

Sepenyampau 3,000 datai ngemata pengawa ngelancharka GPS Zon 4B di Dewan Tayung Langui Kampung Pichin, Serian tadi.