S’wak mungkal DLP taun baru

KUCHING: Subjek Sains enggau Matematik diajar ngena Jaku English ungkup nembiak Primari Satu deka berengkah 1 Januari 2020.

Menteri Pelajar, Sains enggau Pansik Teknologi Datuk Seri Michael Manyin Jawong madah Sarawak udah sedia ngemujurka juluk nya.

“Pengawa matih bala pengajar ti deka ngajar subjek tu deka berengkah bulan baru seraya belanja udah dikemendar kabinet nengeri.

“Kami andal amat subjek Sains enggau Matematik ulih diajar ngena Jaku English berengkah ari pun taun 2020,” ku iya madah nyemetak.

Manyin madah munyi nya rambau aum pemberita pengudah bejadika Aum Entarabansa Melta 2019 Ke-28 ba sebuah hotel tebilang ditu tadi.

Nangkan nya ku iya, pengawa ngajar kededua subjek tu ngena Jaku English ukai polisi tang sebengkah program.

“Program tu sebaka enggau ‘Dual-Language Programme’ (DLP) ti udah dipejalai kenyau ari suba.

“Enti sema bisi apai indai enda setujuka program tu dipejalai ba sekula anak sida, iya enda deka ditampung ba sekula nya,” ku iya.

Manyin mega madahka sebedau tu bala Komiti Kaunsil Direktor China bisi madahka sida enda setuju, nya kebuah program enda dipejalai ba sekula primary bansa China di Sarawak.

“Sebagi ari pekara ti enda diberat ba DLP sebedau tu iya nya bala pengajar ti ngajar dua subjek ngena Jaku English enda dipatih baka ke diatu.

“Nya alai, ba Sarawak empu, kitai deka matih bala pengajar enggau penemu beguna kelebih agi ba pelajar Sains enggau Matematik,” ku iya nambah.

Kena 24 April taun tu tadi, Menteri Pelajar Maszlee Malik udah berandau enggau Kepala Menteri Abang Johari Tun Openg lalu mansutka penemu enti sema Sarawak deka ngena Jaku English ba subjek Sains enggau Matematik.

Abang Johari nerima penemu nya lalu Sarawak deka nyadi nengeri keterubah bejalaika program nya ba taun baru.