BANDUNG: Perintah Sarawak nengah Kaunsil Pemansang Industri Kayu Ramu Sarawak (STIDC) nagit nyendiaka 100 Penengkebang Biak (Poyod) manggai taun 2030, pia ku Sapit Kepala Menteri Datuk Amar Awang Tengah Ali Hasan.

Iya madahka Program Poyod nya sebagi ari pelin strategik timpuh panjai STIDC enggau Perintah Sarawak dikena ngerumban pemansang industri kayu ramu nyadi industri besai reti kelebih agi kereban rumah manggai taun 2030.

“Penengkebang biak tu deka mantu nyungkak industri kereban rumah ba Sarawak ngena pengulih makit besai ba selampur dunya,” ku iya lebuh bejadi ba Konvokesyen tim keterubah nembiak Institusyen Teknologi Bandung (ITB) ditu tadi.

Sama datai ba konvokesyen nya, Kepala Menteri Datuk Patinggi Abang Johari Tun Abang Haji Openg.