S’wak patut nyikap diri tumu

KUCHING: Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah ngenataika penyinu ati ngagai sida ti sebilik enggau seduai ti bebadi nyawa ba penusah di Gua Rusa, Mulu.

Ku Abdul Karim, sida melabaka penusah nyadi ketegal pala ai ari tekat ai atas lubang batu tauka bah tunggal ngujungka penusah bah ngenyit dalam lubang batu nya.

“Kitai bedau teulihka runding dikena ngingatka pemidang niang Roviezal Robin tu tang benung berunding chara mantu sida sebilik ti ditinggalka niang kelebih agi bini iya.

“Nya kebuah kitai deka nyikap diri enggau ngerumban bantu ngagai sida ti tasah dituntung penusah baka tu jemah,” ku iya nerang.

Abdul Karim mansutka jaku rambau aum pemberita Lumba Spartan Sarawak ba sebuah hotel tebilang ditu, kemari.

UNGKUP PENGERAI… Datuk Abdul Karim Rahman Hamzah (dua kiba) nerima baju rambau aum pemberita Lumba Spartan Sarawak ba sebuah hotel tebilang ditu, kemari.

Ku iya, taja bala temuai ti ngusung palan nya udah diterang pasal pemar enggau menua agi latung sebedau sida niki kin tang kitai enda ulih ngenggaika penusah tau nyadi sebarang maya.

“Sida endang udah diterang pasal pemar deka ditapi lebuh tama ngagai lubang batu nya tang penusah baka terap laban petang endang enda ulih disadang kitai.

“Ditambah enggau umur bala temuai ti udah enda sikar bejalai, baka kes tu tadi umur udah manggai 66 taun,” ku iya.

Iya mega ngarapka bantu baka bilun engkabang tauka nganjung jampat raban ngesah ngagai endur penusah nyadi patut diperunding dikena napi penusah baka tu dudi hari.

“Aku ngarapka penusah baka tu ulih teputar jampat dudi hari nyengkaum perambu nyendiaka bilun engkabang ba palan ditapatka temuai,” ku iya nandu.

Kena 12 Julai tu tadi penusah bah tunggal ba pala ai Gua Rusa, Mulu ngujungka siku temuai Belanda Peter Hans Hoverkamp, 66 taun enggau malin temuai Roviezal Robin, 20 taun, bansa Berawan bebadi nyawa.

Taja pia, bini temuai ari Belanda, Gerda Alida mujur diidupka Roviezal taja nyawa diri empu bebadi.

Suara Sarawak