ARTIKEL

SYLVIA G

Sylvia G majak pegari ba industri muzik Iban

Facebook
Twitter
LinkedIn
WhatsApp
Telegram

SYLVIA G siku penanyi ti baru nyingkang enggau nempa nama ba dunya pemerindang industri muzik Iban.

Taja pen agi baru bendar ngepunka pejalai diri ba dunya pemerindang tang iya majak dikelala mensia mayuh nengah lagu Sama Enda Ngugi.

Lagu ti berengkah dikeluarka kena 7 Ogos tu tadi mujur dipeda urung 800,000 orang sereta nerima kelai like 15,000 ari mensia mayuh.

Taja pen lagu Sama Enda Ngugi nya baru dua minggu udah dikeluarka ba baruh pelasar YouTube Sonny Jang Sound Record Studio tang mujur nyadi trending keterubah sereta nyadi buah randau mensia mayuh.

DITAGANG NGUGI
Ngelansa senentang lagu nya, penanyi bajik ti chukup kemerah enggau ngemaruhka diri nya madah, lagu nya bekenang ke pengerindu dua iku sulu ti puntan ba tengah jalai.

“Lagu ku ngenang dua iku sulu ti ditagang apai indai jadi ketegal enda diasuh ngugi tauka nguai ngagai bilik penaik orang bukai.

“Kebuah pia laban siku ari seduai nadai menyadi bukai ti deka nampung bilik penaik sida lalu siku agi endang diasuh ngibun bilik tuai.

“Ketegal balat ditagang jadi ngujung seduai milih jalai beserara,” terang Sylvia G seraya madahka cherita dalam lagu nya nadai mangka pengidup iya.

Lalau iya, taja pen kitai ditagang jadi tang lebuh ngaga sebarang pemutus, anang sesekali melakangka apai indai ngambi pengidup enggau ruang bilik kitai dudi hari diberekat.

MINAT DIPARIT APAI INDAI
Anak tuai ari dua menyadi nya madahka diri ngembuan minat ti besai ba pengawa belagu berengkah ari mit nyentuk diatu.

Minat iya ba pengawa nya endang diparit apai enggau indai ti suah nganjung iya masuk bemacham pekit belagu.

Berengkah ari sekula primari nyentuk nampung pelajar diri ba palan pelajar tinggi, Sylvia G suah ngarika sekula ba pekit belagu ba mayuh renggat.

Ba bulan April tu tadi, Sylvia G berengkah ngaul aplikasyen TikTok lalu masuk pekit belagu Voice of TikTok (VOTT) ti diatur Apai Panda enggau Panggau Buluh Pengerindu (PBP) sereta mujur bulih penuduk keempat.

Udah nya, iya seruran cover lagu orang bukai enggau ngaga live belagu ba TikTok kelimpah dikunsi ba YouTube lalu keterubah suba semina dua tiga iku aja meda tang diatu manggai beratus iku.

JULUK NYADI NYATA
Pengidup Sylvia G berubah seratus lapan puluh darjah lebuh iya mujur ditanya Sony Jang nyadi siku penanyi enggau ngerikod lagu ba baruh perabung Sonny Jang Sound Record Studio.

“Aku balat tekenyit bechampur gaga nyentuk enda tepansutka jaku diri pengudah nerima berita manah nya.

“Pemungkal Sonny Jang Sound Record Studio nya nengkebang enggau meri pengandal ati ngagai aku nyadaka lagu Sama Enda Ngugi.

“Aku chukup beterima kasih laban lagu tu nerima timbal manah ari mensia mayuh, trending keterubah ba YouTube enggau dipeda lebih setengah juta iku,” tusui Sylvia G seraya mantaika tuchum manis ngelai pengaga diri.

Terang iya, perambu asal ngerikod lagu Sama Enda Ngugi ba ujung bulan Ogos tu tang dilanjar tumu ngagai ujung bulan Julai tu tadi.

Kebuah pia, ku iya, bala peminat nyau enda liat ati nganti lagu nya ngujung ke iya sanggup nujah pejalai semilan jam penyauh pulai mansang ari Kedah ngagai Johor Bahru dikena ngerikod lagu nya.

“Taja pen maya nya, aku baru berengkah sakit tang ketegal bala peminat, aku sanggup nujah pejalai ti jauh nya lalu ngetik pengelelak diri ke tisi.

“Naka ulih meh aku ngaga pemadu manah maya ngerikod lagu tu suba ngambi enda ngelebu bala peminat diri taja benung sakit,” ku penanyi beumur 35 taun nya.

BEGEMPUNG NYAGU INDUSTRI MUZIK IBAN
Lebuh dirandau senentang perambu dudi hari, Sylvia G madahka diri nadai ngembuan tagit ti besai laban udah laun berengkah tang iya ransing deka ngeluar mayuh lagu diri dudi hari enti bisi jereki.

Peminat drama Korea nya madah, muzik Iban majak dikerindu semua pupu bansa nyentuk komposer ari Semenanjung Malaysia pen nengkebang lagu ngena jaku Iban.

Ku iya, kitai bansa patut temegah laban nya siti basa dikena ngaku lagu Iban majak dikerindu enggau diterima bansa bukai.

“Nya alai, bala pengemeran industri muzik Iban patut majak kreatif enggau inovatif ba pengawa ngeluarka lagu ba bemacham rentak.

“Pia mega, aku ngarap bisi raban ti ulih ngempung bala artis Iban ngambi sida ulih mansang ke mua kelebih agi ba sukut nengkebang lagu ngena teknologi muzik pemadu baru kemaya hari tu,” ku iya.

Ngena awak tu, penanyi ti ngembuan sada nyawa lunak didinga nya beterima kasih ngagai semua orang ti seruran nyukung iya kelebih agi bala peminat, apai indai, sida sebilik, laki dikesayau, bala bakih enggau kaban belayan.

Iya mega meri besai terima kasih ngagai Sony Jang laban udah meri peluang enggau ngelempai pengandal ati ngagai iya nyadaka lagu Sama Enda Ngugi.

Dikena ngujung ke randau, Sylvia G ngelalau bala peminat terus nyukung pejalai iya ba dunya pemerindang ngambi iya ransing agi ngeluarka mayuh lagu dudi hari dikena merindang sida.

BERITA LAIN

BERITA TERBARU