Taba Kala Dana Mukah bisi didero mural motif Iban

MUKAH: Siku-siku kitai mensia endang ngembuan pengelandik, bisi nya nemu beranyam, betenun enggau bisi mega landik nero mural.

Siku penero, Bryne Rush Adeli, 24 taun asal ari Kampung Teh Mukah madahka pengawa mantaika pengidup bansa Iban nengah dero mural ba Taba Kala Dana Mukah ukai pengawa ke muntang dikereja.

Iya madahka pengawa nero mural tu bepelasarka pengidup bansa Iban.

Ambika banding, iya madah diri fokus pasal pengidup bansa Iban ari sukut penemu mensia mayuh.

Pia mega, Byne udah dulu mansik pekara tu sebedau nero ba Taba Kala Dana Mukah nya.

NGEPAN IBAN… Gambar siku indu ngena ngepan Iban ti didero Byne.

Nya kebuah, pengawa nero tu ukai muntang dikereja kelebih agi nero pasal pengidup bansa bukai.

“Aku nero pasal pengidup bansa Iban ngambi orang bukai ngelala pengidup, pekayan asal enggau sejarah bansa Iban.

“Enti nyebut pasal bansa Iban, kitai suah ninga orang madahka bansa Iban tu pengayau, landik betenun pua kumbu.

“Nya endang amat lalu mural didero aku tu nyengkaum terabai, ngepan, bujang berani ti bisi pantang Bungai Terung ba tubuh iya enggau ke bukai.

Nambahka nya, Byne mega bisi nero gambar burung kenyalang, siku indu benung ngajat, ukir tenun, pantang bungai terung enggau ke bukai.

KELAI PEMERANI… Gambar terabai enggau bujang berani bepantang Bungai Terung didero Byne mandangka pemerani bansa Iban.

Lebuh beratika semua mural nya, kitai bela nemu Byne tu puh nero semua bansa dero nya laban pengawa nya mar dikereja sereta mesti fokus nangika bisi pengilap.

“Ambika chunto, mural pala keruntuk ditu udah bisi dalam sejarah sentang baka ni bujang berani Iban kelimpah berasai temegah pengudah mujur ngelaban munsuh.

“Nitihka sejarah Iban, bujang berani deka dipebasa enti mujur mai pala munsuh laban nya nandaka sida kering sereta nadai penangi betempuh enggau munsuh.

Berebak enggau nya, mural manuk pansuh didero iya ngayanka pemakai asal bansa Iban kelebih maya ngintu pengerami.

Byne mega bisi nero mural pantang Iban iya nya Bungai Terung ba dinding mural nya.

“Nitihka utai dibacha aku pasal bansa Iban, suba pantang Bungai Terung nya enda tau digaga sengapa laban sida ke bisi pantang nya lepas mujur mumpung pala munsuh

“Bujang berani ti mujur bedengahka pala munsuh deka dipantang Bungai Terung ba dada tauka ba rekung.

“Nya kebuah, suba enda tau sebarang bepantang Bungai Terung tu seagi nadai mai pulai pala munsuh laban ukir nya mandangka pemerani sida,” ku Byne nerang silik.

“Sama mega enggau ajat Iban ke alai aku nero gambar siku indu ayun lundai ngajat.

“Nya alai, aku ngarapka mensia mayuh ulih meretika budaya Iban nengah asil dero aku tu,” terang Byne silik agi.

Berebak enggau nya, iya madahka semua mural ti didero nya ngembuan reti kediri empu.

Diatu, mural didero iya narit ati mensia mayuh ti ngelawa Taba Pantai Kala Dana Mukah tu.

Kelimpah ari nya, iya meri besai terima kasih ngagai Parlimen Mukah laban nyendiaka pelasar pemadu manah mantaika pengelandik iya.

“Aku ngarapka mensia mayuh ulih belajarka mayuh agi pasal adat enggau budaya raban bansa bukai nengah dero ke bisi dipandang ditu.

“Aku mega ngarapka semua kitai nyaga manah dero tu nyadika pematak bala pengusung lalu sukung mih penero menua kitai,” ku iya nyimpul randau enggau Suara Sarawak.