Tajai mantaika penulin pesaka Iban

KUCHING: Nipakka rambai jaku Nyaguka Adat enggau Main Asal Iban, Serakup Main Asal enggau Seni Tajai Sarawak naka ulih mantaika chara enggau rurun orang kelia ngena ngepan sereta keresa ngepan nitihka rurun enggau pematut.

Penyanding Penemu Serakup Tampun Juah Asal Iban (Tajai), Dato’ Sri Edmund Langgu Saga madah, nengah gempung ukai dikuasa perintah (NGO) baka tu, kitai ulih ngangkatka agi peninggi reti enggau rega keresa ngepan Iban.

“Tu nentuka rebak baru nemu pemesai reti enggau rega pesaka asal aki ini sida menya laban ngepan asal tu tau dikumbai kitai kelai tauka identiti bansa Dayak Iban.

“Pia mega menua dikumbai orang Tampun Juah tu endang asal penatai bansa Iban kelebih agi di Sarawak. Kitai bisi tiang pengingat enggau pentik ti ditanam ke tanda penatai asal kitai ari menua sepiak (Kalimantan),” terang iya.

Edmund mansutka jaku tu lebuh bejaku ba Pengerami Makai Lemai Bejadika Serakup Tajai Sarawak dipenyadika Sapit Kepala Menteri Datuk Amar Douglas Uggah Embas ti diarika Temenggong Raban Bansa Iban Bagi Menua Kuching – Samarahan, Temenggong Dato Bernard Aggan Assan.

Pengerami digulu urung 700 iku temuai nyengkaum bala menyadi ari Kalimantan, Indonesia nya richah diatur ba Christian Ecumenical Worship Centre, Stampin ditu malam tadi.

Berindik ari nya, pengeran serakup tu nyaguka adat, keresa enggau main asal patut ditunda bala bukai ngambi sama menggi sereta beduaka tanggungpengawa nyaga enggau ngintu pesaka tuai nengah chara enggau jalai ti meruan.

PERANSANG TUAI… Dato’ Sri Edmund Langgu meransang rebak baru besaup nyaguka adat, main asal enggau pesaka bansa Iban.

 

RICHAH… Bala temuai teperindang enggau tempap Gendang Pampat ari raban Kemada.

Suara Sarawak