BINTULU: Nadai agi atur bejalaika peresa chulit RT-PCR ungkup mensia mayuh ti deka tama ke Bintulu berengkah sehari tu (18 September).
Chairman JPBBB Bintulu Jack Aman Luat madah raban sida udah ngaga pemutus nitihka gerah ari JPBN Sarawak ke dibantai kena Hari Lima.
Ku iya, Bintulu sebaka enggau menua bukai patut nitihka pemutus JPBN lalu peresa chulit enda ibuh agi diguna ngagai sapa ke udah genap tuchuk dua dos vaksin beduduk ari Sarawak udah nyapai imuniti beraban.
Taja pia, ungkup orang ke bedau nerima vaksin, sida patut mantaika pemutus peresa chulit kelimpah mandangkan permit polis dikena ngilah pelilih menua dikena nentuka sida nadai kena rampit Covid-19, ku iya.
“Jam diatu, semua atur bekaul engau pejalai ngilah pelilih menua nyengkaum ke Bintulu sebaka enggau menua bukai dikena ngemuntangka pejalai mensia mayuh,” ku iya ke mega Residen Bintulu.
Sebedau nya, Bintulu entara bagi menua di Sarawak ke minta mensia mayuh mesti peresa chulit nyema deka mansa bagi menua nya.
Beduduk ari nya, atur tu ngujungka mayuh mensia mayuh sebana laban ngasaika pengawa nya ngenusah sida ketegal ungkus belanja ke besai enggau ke bukai.
