Taman Aman nyungkak dagang temuai

SIMANGGANG: Pangka pemansang ari beberapa projek ke baru udah dipenyadi Kepala Menteri Datuk Patinggi Abang Johari Tun Openg lebih agi baka Projek Waterfront Palan Pengerami Benak endang tentu ngerembai agi sektor dagang temuai ditu.

Siku ketuai raban bansa, Temenggong Kueh Aik Seng madah enti projek nya udah tembu jemah iya deka matak mayuh agi temuai ari dalam enggau luar datai ke Sri Aman.

“Sida ke raun kitu mega deka berasai lantang kelimpah ulih raun ngagai Taman Aman ke digaga bisi jalai rembus ngagai waterfront.

“Ngelansa pasal Taman Aman, tu kebendar udah lama dipinta kami. Nyadi lebuh kepala menteri mansutka pekara nya, utai tu sebagi ari berita chukup manah ngagai semua peranak Sri Aman.

“Jemah kitai bela nemu taman tu deka digaga ngerimbai muzium (Rumah Sri Aman) ke dikelinggi mayuh pun kayu manah endur aktiviti pengerai,”ku iya.

Kueh madah munyi nya lebuh dirandau Suara Sarawak bekaul enggau projek pemansang di Sri Aman ba Opis Pelilih Sri Aman kena 22 Jan tu tadi.

Nangkan nya, Kueh madah penembu Projek Jematan Batang Lupar jemah tentu ngemuntang mayuh agi datai kitu ukai semina mansa aja baka diatu.

“Nyadi enggau nya, kitai arapka menua Simanggang enda agi tinggal pemansang dibanding enggau menua bukai.

” Arapka projek tu ulih tembu dalam dua tiga taun tu sereta meri terima kasih besai ngagai Perintah GPS dibaruh iring Kepala Menteri Abang Jo, “ku iya seraya madah rayat Sri Aman dikearap terus betunggang sukung ngagai GPS.

Temenggong Kueh Aik Seng

Suara Sarawak