Tambah enggau kemanahka infrastruktur ba Tanjung Manis

KUCHING: Tanjung Manis agi tubah begunaka infrastruktur tambah dikena ngerumban pemansang ba menua nya.

Menteri Muda Pemansang Mengeri enggau Pengeraja Asal, Datuk Len Talif Salleh madahka juluk iya deka meri pengelantang rayat menua nya mindah enggau ngereja pengawa.

Iya ke mega Kaban Kaunsil Pengatur Pusaka madah, bisi dua pekara patut ditambah dia; infrastruktur enggau arus penyambung.

“Infrastruktur pemun ba Tanjung Manis endang udah bisi, tang perengkaguna mesti ditambah tauka diseruri baka jalai alun, jematan, sekula, rumah enggau ke bukai.

“Pia mega arus penyambung, tiang pemanchar endang udah bisi din, tang penyampau tubuh peranak majak nambah bekau industri ngerembai, nya kebuah pekara tu patut ditambah,” ku iya.

Len Talif bejaku munyi nya beserimbai enggau randau ekslusif Menteri Muda Pemansang Mengeri enggau Pengeraja Asal ti mega Kaban Kaunsil Pengatur Pusaka di Wisma Sumber Alam ditu, tadi.

Ku iya, palan penyangkai kapal mega patut ditambah laban palan nya deka nyadi palan penyangkai kapal besai ari serata menua.

Suara Sarawak