SARATOK: Tambahka kuota pelatih pengajar opsyen Jaku Iban ba semua Palan Pematih Pengajar (IPG) siti chara engkeman dikena mutarka penanggul suntuk pengajar Jaku Iban ba sekula di nengeri tu.
Pengajar Jaku Iban ari Sekula Primari (SK) Kalaka Central, Miri anak Ason madah, kuota pengajar opsyen Jaku Iban ba genap IPG patut ditambah dikena mutarka penanggul suntuk pengajar Jaku Iban ba sekula primari enggau sekondari.
“Perambu tu ulih diserenih sereta diperatika raban bekaul berengkah ari diatu.
“Pia mega, perundingka chara matak rebak baru rindu ngena jaku Iban lebuh berandau enggau pangan diri,” ku iya.
Miri mansutka penemu nya lebuh diasuh nimbal penemu bekaul enggau penerang dibantai Kaban Parlimen (MP) Betong, Datuk Robert Lawson Chuat ba Aum Keterubah Renggat Keempat Parlimen Ke-14 bekaul enggau isu suntuk pengajar Jaku Iban ba Sarawak.
Nangkan ke nya, ba penemu pengajar Tedrick Jana Katum ari Kuching Skills College, lebuh diasuh nimbal pekara nya semina madahka diri rindu agi nyema perintah bisi perambu ngaduka jaku Iban nyadi jaku rasmi kedua laban di nengeri tu chukup mayuh komuniti Iban.
Kenu ku iya, ari nya raban nembiak tentu nadai pilih tang mesti ngambi pelajar nya enda ngira ba dedini endur sida besekula di nengeri tu.
Ungkup rikod, diatu bisi 2,155 iku pengajar Jaku Iban ba sekula primari lalu ba sekondari semina 274 iku. Penyampau pengajar Jaku Iban ke patut ditambah iya nya urung 394 iku ungkup sekula primari enggau 119 iku ba sekula sekondari di serata Sarawak.
