KUCHING: Menteri Besai, Datuk Seri Anwar Ibrahim ngemendarka agih belanja tambah penyampau RM1 bilion dikena ngemansang infrastruktur adan Sarawak enggau Sabah ti ngimbai Kalimantan, Indonesia.
Ku iya, bekau ari pengawa Indonesia ti mindahka indu mengeri baru ngagai Nusantara di wilayah Kalimantan, Malaysia enda ulih neju ke kededua nengeri tu tinggal jauh.
“Aku udah ke Jakarta apin lama lalu diberi penerang bekaul perambu mindahka indu mengeri Indonesia.
“Nya alai, aku enggai meda menua kitai tinggal laban kitai deka ngena peluang tu ngemansangka agi adan menua Sabah enggau Sarawak.
“Nya kebuah, aku udah ngemendarka agih belanja tambah ari belanja ke dulu ungkup Sabah enggau Sarawak pemyampau RM1 bilion dikena ngemansangka adan menua,” ku iya.
Anwar bejaku munyi nya serimbai Hari Malaysia 2023 Renggat Nasional ba Stadium Perpaduan ditu, malam tadi.
Kelimpah ari nya, iya udah ngasuh Sapit Menteri Besai, Datuk Seri Fadillah Yusof ngerumban pengawa nembuka Jalai Besai Pan Borneo (LPB) tumu ari taga ti udah ditetap.
“Nadai agi kebuah projek nya enda ulih tembu lengkas. Sarawak lebih maju ba projek nya, tang bisi sekeda seksyen projek LPB ti deka diputar kelebih agi ba Sabah,” ku iya.
Ba lansa bukai, Anwar meri tabi puji ngagai Opis Menteri Pelajar laban udah mutarka isu sekula repuk di selampur menua nyengkaum ba Sabah enggau Sarawak sebedau bulan Oktober tu.
