Tambang bilun niki ngeruga industri dagang temuai Mulu-Bario

KUCHING: Opis Menteri Dagang Temuai, Seni, Main Asal, Nembiak enggau Lumba minta MASwings beratika baru pemutus sida deka nikika rega tambang bilun peranak menua luar ti terebai ngagai Bario enggau Mulu berengkah 1 November tu.

Menteri iya, Datuk Abdul Karim Rahman Hamzah madahka serikat penerebai anang berumban nikika rega tambang nya tiga kali lipat diatu enggau nadai ngira empas ngagai industri dagang temuai ba Bario enggau Mulu.

“Kitai minta sida beratika dulu, anang berumban nikika rega tikit tang nadai ngira empas ari pemutus sida nya.

“Pemutus tu deka ngeruga industri dagang temuai, industri inap desa enggau meri empas ngagai semua inisiatif udah dipejalaika kami,” ku iya.

Karim mansutka jaku nya ba aum pemberita pengudah bejadi Palan Infomasyen Temuai (VIC) Kaunsil Dagang Temuai Sarawak (STB) ti udah dikemanah ba Old Court House, ditu tadi.

Iya mansutka penemu nya nimbal penerang Presiden Gerempung Rurum Kelabit, Dr Philip Raja ti madahka komuniti ba Bario kelebih agi ke ngempu homestay enda lantang ati ke pekara nikika rega tambang nya.

Dr Philip madah, pekara tu engka tau ngasuh temuai menua luar enggai nemuai ke tanah tinggi Bario ngujungka sida napi pengeruji sereta nutup dagang homestay.

Diatu, rega tikit ungkup temuai luar ngena bilun MASwings ngagai Miri-Bario semina RM118 siku lalu rega tikit bilun pulai mansang Miri-Bario berengkah 1 November tu deka ditiki manggai RM1,037.

Kelimpah ari nya, rega tikit bilun baru ungkup penerebai Miri- Marudi (RM738), Miri-Lawas (RM922) enggau Miri-Labuan (RM908) sereta Kuching-Mulu (RM1,386).

Suara Sarawak