KUALA LUMPUR: Opis Menteri Pengangkut nengah Komiti Besai Penerebai Bilun Malaysia (Mavcom) seruran matau rega tikit bilun ungkup semua penerebai bilun dalam menua nyengkaum entara Semenanjung enggau Sabah sereta Sarawak kelebih agi maya musin pengerami.
Menteri Pengangkut, Anthony Loke Siew Fook madah, pengawa serikat penerebai bilun netap tambang bilun dalam menua bepelasar pekara ti engkeman ba servis langit dalam menua ba taun 2006.
Ku iya, bekaul pekara nya, raban menteri ngaga pemutus serikat penerebai bilun menua ti nyendiaka servis langit dalam menua diberi hak nentu rentayan, penyuah penerebai bilun enggau tikas tambang bepelasar ke peminta ba makit.
“Ba pekara tu, raban serikat penerebai bilun bisi bejalaika inisiatif khas nyendia tikit bilun murah.
“Ambi ke chunto, AirAsia udah nyendia 62 penerebai tambah ti nyendia 11,400 penuduk enggau tambang murah tetap ari Kuala Lumpur enggau Johor Bahru ngagai tujuh palan dilawa.
“Tujuh palan tu nyengkaum Kinabalu, Sandakan enggau Tawau ba Sabah sereta Kuching, Sibu, Bintulu enggau Miri ba Sarawak.
“Penerebai bilun tu berengkah ari 19 nyentuk 21 April enggau 28 nyentuk 30 April beserimbai Hari Raya Aidilfitri.
“Pia mega, Malaysia Airlines Berhad nyendia program khas ungkup nembiak baka MHexplorer lalu bala nembiak ti rejister ba program tu ulih ngasaika diskaun nyentuk 30 peratus ari rega tikit bilun.
“Pemaik bukai baka elaun kantung tambah 10 kilogram (kg) enggau inisiatif khas ungkup sida sebilik enggau bala bakih sida,” ku iya.
Anthony mansutka jaku nya rambau nyaut tanya Senator Rita Sarimah Patrick Insol ba sesyen tanya saut ba Dewan Rakyat.
