Tamira Lallemand temegah champion Miss Ethnic BPCHF 2019

KUCHING: Tamira Lallemand, 22 taun berasai temegah pengudah mujur bulih gelar champion pekit Miss Ethnic Beauty Pageant Culture Harvest Festival (BPCHF) 2019.

Indu penakan Bidayuh nya mujur ngalahka 11 iku penyereta finalis bukai madah temegah nerima gelar champion beserimbai enggau Sarawak Harvest and Folklore Festival 2019 (SHFF) ke diatur di Kampung Budaya Sarawak kena 26 April tu tadi.

“Aku enda nyangka diri nyadi champion laban tu keterubah aku nyereta pekit pemajik gamal.

“Sebedau nyereta pekit tu aku mayuh meda pekit pemajik gamal ba ‘youtube’ meda chara sida bejalai, nanya mayuh orang enggau ke bukai.

“Aku nemu pasal pekit tu ari ‘facebook’ laban media rama mayuh guna jeman diatu. Nyema bisi nembiak rebak baru bisi ati deka enggau pekit ti baka tu aku ngarap ke sida nyadi diri empu laban nya ti ngasuh aku nyadi champion malam tu,’ ku iya.

ENDA NGADANG…. Tamira Lallemand (duduk tengah) mujur ngempu gelar Miss Ethnic Beauty Pageant Culture Harvest Festival 2019 pengudah nerima jumpang ari Datin Melinda Claudia Bucking Lawan.

Kelimpah nya, Dayang Nursyafiqa-Qawiemah madah iya pan enda nyangka bulih lumur dua ba pekit tu laban mayuh pemar ti udah ditapi sida ti nyereta.

“Tu keterubah aku enggau bepekit pemajik nya kebuah aku amat enda nyangka bulih lumur.

“Utai ti mengkang dikenang aku lebuh ti nyereta pekit tu iya nya aku bulih bakih lalu bekelala enggau mensia mayuh lebuh ti ngaga mayuh bengkah program,” ku iya seraya meri pengaga ati ke sukung ari apai indai enggau bakih iya.

Nangkan ke nya, Lydia Yusreena Abdul Ellias penakan Iban enggau Jawa beumur 24 taun teulih ke lumur tiga lalu nyadi champion Miss Talent SHFF 2019 mega berasai gaga ati laban sigi udah lama nyikap diri ba mental enggau fizikal.

“Orang ti nyadi tulang belakang aku ba pekit tu iya nya indai aku empu ti seruran nyukung ba mayuh bengkah pengawa ti dikereja aku.

“Ba Miss Talent SHFF 2019 tu aku mantai ke tanda ari bansa Jawa pasal siku indu bajik ti deka nguntik siku lelaki sigat. Bemacham perengka ti dikena aku betanda nyengkaum betanda ngena ‘kuda kepang’,” ku iya.

Pekit tu disereta 12 iku finalis peranak menua Sarawak ti bemacam pupu raban bansa mantai ke pengelandik sida enggau perengka baju asal ti dikena. Ninting taun piak pengatur sigi udah milih siti baju asal ti dikena ari siti bansa di Sarawak lebuh malam finalis tu. Lalu ke taun tu baju asal Orang Ulu diangkat nyadi baju pekit ti dikena pesereta.