Tamu dikuasa MDS dibuka naka pukul 1.00 ngalihari

SARATOK: Semua pasar tamu dibaruh kuasa Kaunsil Pelilih Saratok (MDS) tau dibuka lalu mensia mayuh ke bedaja ba endur tu dikemendar bejualka asil sida berengkah 27 Mac tu tadi.

Pemangku Sekretari Kaunsil Pelilih saratok Bilong Engkas lebuh ngenuku pekara tu madah, pemutus muka palan tu berindik ari penerang dibantai perintah nengeri apin lama ti nesau semua tamu enggau palan dagang mit dibaruh kuasa piak Kaunsil Kandang Menua (PBT) tau dibuka nitih jam ke ditetap.

“Palan bedaja ikan,engkayu babas enggau sayur udah dikemendar dibuka ba semua Tamu MDS berengkah ari pukul 7.00 pagi nyentuk pukul 1.00 ngalihari.

“Atur tu digaga kena nagang pengerekai igi penyakit Covid 19 ke mega dikena nyeliah mensia mayuh ari begelumu bebala mayuh,”ku Bilong maya dirandau pemberita, apin lama ke udah.

“Notis nuju semua pedaja ba tamu MDS baka di Saratok,Kabong,Roban enggau Nyabor kita diatu dikemendar bejual tang meseti nitih jam ke udah ditatak,”ku iya.

Nambah nya, iya ngarap mensia mayuh patut nyaga takah penyauh 1 meter ari pangan diri, kelimpah nguna sengkabung mua maya ke bejual.

“Pia mega, mensia mayuh ke datai bebelika sayur tauka pemakai bukai anang enda sengkabung mua.

“Aku besampi ke semua kitai bela diseliah ari penyakit tu lalu sama mih nyaga pemeresi diri dikena nyeliah penyakit ti ulih nganu nyawa,” ku iya.

BILONG ENGKAS

Suara Sarawak