SONG: Palan bedaja tauka tamu ba makit pasar ditu deka digagaka perabung enggau diberi mija.

Adun Katibas, Lidam Assan madah, bala ti ngena palan nya deka lantang agi bedaja, badu agi ngelaban panas enggau ujan udah pengawa nya tembu ila.

Ku iya, ekonomi rama enggau penatai pemisi rayat ulih disungkak ari pemisi palan bedaja ti meruan.

“Kitai deka ngaga perabung enggau lot mija diagihka siku-siku pedaja ngambi sida deka berasai lantang enggau likun lebuh bedaja dia.

“Tu entara perambu dikena aku ngemansangka rayat ditu ari sukut ekonomi rama,” ku iya madah nyemetak.

Lidam mansutka jaku nya lebuh iya ngelancharka Program Pasar Minggu ba Makit Song empai lama.

Iya madah, orang ke meli nadai ati nangi bebelika utai daja laban bisi endur ti meruan enggau beresi.

Tambah mega ku iya, menua kitai diatu nyau udah datai jalai lalu mayuh orang datai lalu ngetu dia bebelika bulu babas enggau lauk ke bukai.

Enti suba ku Lidam, kitai nurun ke pasar Song semina bebelika utai aja tang diatu kitai udah bisi pemansang laban udah nemu enggau orang bedagang.

“Menua udah datai jalai, pelaba aku engka bisi laku agi utai dijual bala kitai ditu diatu.

“Aku mega bisi nerima peminta ari bala ke bedaja ba makit tu ambi palan tu ulih endur bedaja ninting hari.

“Tu pengawa ti chukup manah lalu tu mih utai dikedeka aku, rayat bisi runding ngemansangka diri ba pengawa dagang.

“Aram mih sama begulai enggau aku ngemansang ke menua kitai,” ku jaku peransang Lidam.

Sama datai Tuai Kunsil Opis Pelilih Menua Lating Minggang, Sekretari Politik Menteri Dagang Dalam Menua enggau Pekara Penguna (KPDNHEP), Ambrose Abong, Superintendent Opis Tanah enggau Survei (JTS) Kapit, Sagu Unting enggau Sekretari Kaunsil Pelilih Kapit (MDK), Kelimbik Sibat.