KUCHING: Suku raban bansa Penan enggau Kenyah ari 20 buah rumah panjai setuju meri sebidang tanah pemesai lima ikar nyadi taba nirika Klinik Pengerai Long Urun tu.

Ba sebengkah penerang di laman Facebook Pusat Khidmat Masyarakat ADUN N.66 Murum, Adun Murum, Kennedy Chukpai Ugon disempulang bala bukai udah ngabas taba nirika Klinik Pengerai Long Urun.

Pejalai Chukpai tu disempulang pegawai Opis Tanah enggau Survei Bagi Menua Kapit, Kuba Lusat udah ngabas taba nya ungkup pengawa ngambi tanah nya.

Pia mega, Chukpai madahka taba nirika klinik nya engkeman amat sereta strategik laban ba tengah genturung pendiau di Long Urun ditu.

Berebak enggau nya, pengawa nirika klinik nya beguna amat nentuka peranak di Long Urun enda ibuh mindah jauh bakabeperesa pengerai ngagai Klinik Pengerai Sungai Asap.

Sama datai Pegawai Pengereja Pengawa Opis Pelilih Mit Sungai Asap, Hamzi Sude, pengari Pegawai Opis Pengerai Bagi Menua Kapit, pengari ari serikat ladang Urun Plantation Sdn Bhd sereta pengari tuai raban bansa.

“Kami udah mantaika perambu nirika klinik pengerai tu ngagai Sapit Menteri Pengerai Malaysia II, Datuk Aaron Ago Dagang lebuh iya ngabas Klinik Pengerai Sungai Asap enggau Tubah kena 14 Julai tu tadi.

“Opis Pengerai Nengeri Sarawak nengah Sapit Direktor iya, Paul Szin Rigel udah nyukung pengawa nirika klinik pengerai tu.

“Nya kebuah, klinik pengerai tu deka digaga nengah kerejasama enggau raban peribit nyadi Program Tanggung Pengawa Rama Korporat (CSR) dikena ngerumban pengawa nirika klinik pengerai tu.

“Aku meri besai terima kasih ngagai serikat ladang Urun Plantation Sdn Bhd laban deka bekerejasama enggau kami nirika klinik tu nyadi sebagi ari CSR ungkup peranak ba Long Urun tu,” terang iya.

Nya alai, Chukpai ngarapka pengawa nirika klinik tu lanchar dipejalai laban nya besai guna ngagai komuniti ditu kelebih agi maya pandemik tu.