LUNDU: Perintah Sarawak seruran ngaku enggau ngetanka hak rayat pasal tanah Adat Bansa Asal (NCR) enti peminta tanah nya ditagih nitihka atur undang-undang.

Adun Tanjong Datu, Datuk Amar Jamilah Anu madahka pengawa nyukat enggau meri surat pala tanah NCR udah dipejalaika Perintah kenyau ari taun 1960-an nyentuk diatu.

Ku iya, Perintah Sarawak bejalaika Program Nyukat Tanah NCR Inisiatif Baru ba taun 2010 ba dua renggat pengudah pengawa nyukat tanah chara lama ba timpuh 50 taun ke udah nya enda engkeman agi.

“Ba renggat keterubah, pengawa nyukat kelingi enggau gazet di baruh Seksyen 6 Kanun Tanah Negeri nyadi Rizab Komunal Bumiputera (Betanam Betupi).

“Ba renggat kedua, pengawa nyukat tanah lot ngatika diri enggau meri surat pala tanah di baruh Seksyen 18 Kanun Tanah Negeri deka dipejalai,” ku iya.

Jamilah mansutka jaku nya pengudah Pengawa Nyuaka Gazet Rizab Komunal Bumiputera dibaruh Seksyen 6 Kanun Tanah Negeri enggau Surat Pala Tanah Seksyen 18 Kanun Tanah Negeri ungkup sitak Tanjong Datu di Balai Mayuh Guna Mahligai Gading Lundu, ditu kemari.

Nambahka nya ku Jamilah, bisi tiga genturung pendiau nerima Gazet Rizab Komunal Bumiputera dibaruh Seksyen 6 KTN.

Tiga genturung pendiau tu iya nya Kampung Rayu Melayu, Kampung Rayu Iban enggau Kampung Sungai Limo.

Pia mega, bisi 25 iku penerima Surat Pala Tanah di baruh Seksyen 18 Kanun Tanah Negeri ke alai bela enam iku penerima ari Kampung Siru Melayu enggau Kampung Siru Dayak sereta 12 iku penerima ari Kampung Bajo Bergantong enggau Sungai Batu.

“Bala penerima bukai udah nerima 110 surat pala tanah Seksyen 18 KTN deka disua chara berenggat kena 20 enggau 21 April tu,” ku iya.

Sama datai Pegawai Pelilih Lundu, Gustian Durani sereta Penguasa Tanah enggau Survei Bagi Menua Kuching, Alfian Bawi.